KCDK-E veng da ke wa her kes tewrê çalakîyanê protestokerdişê hêrişanê vera Elewîyan bibo ke Sûrîye de yenê kerdene.
KCDK-E vera hêrişan û qirkerdişan ke Sûrîye de vera Elewîyan yenê kerdene eşkerayîye daye û semedê tewrbîyayîşê çalakîyan veng da.
Eşkerayîye de wina ame vatene:
”Dewleta Tirke sey qirkerdişanê xo yê ke Mereş, Roboskî û Madimak de kerdî wazena Sûrîye de zî qirkerdişan bikero.Bi provokasyonê Dewleta Tirke çeteyê SMO û HTŞyî hêrişê Elewîyan kenê. Wezîrê Tirkîya Hakan Fidano ke destê ci de gonî est a, gama ke şi Sûrîye bawerîyê cîya cîyayî, cinî û şarê Kurdî sey hedefî mojnayî ra ke verê provokasyonan û qirkerdişan bêro akerdene.
Xeylê waran de ke destê HTŞ’î de yê, Dewleta Tirke bi çeteyanê DAIŞ’î hêrişê Elewîyan kena. Çeteyî verê çimanê dinya bi hêrişê vera Elewîyan sûcê merdimîye kenê û dinya nê seyr kena. Sere de Tartus, Lazkiye, Hama û Humus de xeylê waran de qirkerdişê Elewîyan dîyayî destpêkerdene. Vera şaran û bawerîyan tehlukeyê qirkerdişî est o. Ganî dezgehê eleqedarî yê mîyanneteweyîyî cade vera nê têbigêrê.
Ma sey KCDK-E bi na wesîle qirkerdişê Mereş û Roboskî şermezar kenê û şehîdan bi rêzdarî yad kenê. Ma veng danê heme şarê xo û dostanê xo ke vera hêrişanê qirkerdişî ke Sûrîye de vera şaran û bawerîyan yeno kerdene wa vengê xo berz bikerê. Ma veng danê ke wa têkoşîn bêro xurtkerdene û wa her kes tewrê çalakîyan protestoyî bibo.”
