KCDK-E derheqê qerarê ‘Heqê Hêvîye’ yê Komîteya Wezîran a Konseya Ewropa de beyanatêk vila kerd û vat heqê hêvîye nêeşkeno bêro taloqkerdene û ganî prosedurê îhlalî dest pêbikero.
Kombîyayîşê Komîteya Wezîran a Konseya Ewropa ke 15-17ê êlule de ameye viraştene, heqê hêvîye yê Rayberê Şarê Kurdî Abdullah Ocalan û tepişteyanê ke eynî rewşe de yê, reyna ameye rojdem. Komîte hetanî hezîrana 2026î wext da Tirkîya, KCDK-E nêzdîbîyayîş sey taloqkerdişî bi name kerd û veng da ke ganî prosedurê îhlalî bilezabez dest pêbikero.
KCDK-E vat dewleta tirke huqûqê mîyanneteweyî binpay kena û gamanê laziman nêerzena, no halê Komîte zî ke “vindertişêko qerardar nêmojnena” na bêhuqûqîye rê zemîn hazir keno.
Beyanatê KCDK-E de ameyê vatene: “Heqê hêvîye heqêko bingeyin o ke rûmetê însanîyetî pawitişî ra yeno û nêeşkeno bêro taloqkerdene. Kesê ke cezaya hepsê muebetê giranî girewto, rojêk îhtîmalê veradayîşê înan ganî bibo. Na çarçewe de vurîyayîşê qanûnî ganî lezabez bêrê kerdene, Rayber Apo û tepişteyê ke eynî rewşe de yê, ganî nê heqî ra îstîfade bikerê.”
KCDK-E ard vîrardene ke heta ewro Komîte tena mudet dayo Tirkîya labelê prosedurêko zelal ê îhlalî dest pênêkerd: “Komîte herinda ke gamêka huqûqîye bierza, tercîh kerd bi îqazî Tirkîya rê rayîr akerdo. Labelê ganî proses bingeyêko huqûqî ser o ronişo.”
Beyanatî de ame îfadekerdene ke azadîya Rayberê Şarê Kurdî Abdullah Ocalan seba aştîya Rojhelatê Mîyanênî şerto verên o: “Seba ke Rayber Apo bieşko muzakereyan îdare bikero, ganî şertê weşîye, ewleyî û azadîye bêrê awankerdene. Seba ney heqê hêvîye heqêko bingeyin, huqûqî û meşrû yo.”
KCDK-E vengdayîşê xo bi nê çekuyan tekrar kerd:
“Komîte herinda na rewşa taloqkere, ganî qerarê xo reyna binirxno û bilezabez prosedurê îhlalî dest pêbikero. Rayber Apo ke îradeyê mîlyonan o, roşnîya hêvîye ya şaranê dinya û garantîyê aştîya Rojhelatê Mîyanênî yo, ganî şertê ciwîyayîş û xebatê azadeyî rew bêrê caardene.”
Beyanat bi nê vengdayîşî qedîya: “Ma venga şarê xo danê ke heta ke netîce bigîrê, seba temînkerdişê azadîya Rayber Apoyî ya fîzîkîye heme îmkananê xo seferber bikerê û wayîrîye bikerê, seba ney bi qerardarî têkoşînî berz bikerê.”
