Sîyasetmedaro kurd Osman Baydemîr forumê Dihokî de vat: “Proseso ke birêz Ocalanî dayo destpêkerdene, beno encamê xebata yewîya şarê kurdî. No proses do aştî û aramî bîyaro Rojhelatê Mîyanên.”
Parlamenterê HDP’yî û Serekê Şaredarîya Amedî yê Şariştanê Girdî yê verê Osman Baydemîr zî beşdarê Forumê Aştî û Ewleyî yê Rojhelatê Mîyanên ê Dihokî bi. Osman Baydemîrî zî forumî de qisey kerd û bale ant prosesê Aştî û Komelê Demokratîk û yewîya şarê kurdî ser o.
‘Dermanê dejê ma yewî ya”
Osman Baydemîrî qiseykerdişê xo de bale ant muhîmîya yewîya kurdan a seba aştî ser o û vat: “Ma ewro bi dejê xo û dermanê dejê xo zanê. Dermanê dejê ma tifaq û yewîya zereyî ya.”
‘O kefen dirîya’
Baydemîrî peymana Sykes-Picotî ke Kurdîstan kerdbî çar perçe ard vîrî û wina vat: “Peymana Sykes-Picotî sey kefenêk laşê ma ra amebi piştayene la bi saya şehîdanê Kurdîstanî o kefen dirîya. Tifaqê kurd û Kurdîstanî do bibo bingeyê azadîye û aştî. Eke aştî û aramî Rojhelatê Mîyanênî de awan biba, do şarê Tirkîya, Îran û Îraqî zî ma reyde biresê aştî û aramî. Xebata tewr pîroze, xebata aştî ya.” Baydemîrî da zanayene ke tifaqê Kurdîstanî do bibo bingeyê aştî û wina vat: “Eke tifaqê kurdan awan bibo do Tirkîya û Îran zî biresê aramî.”
‘Proses do aştî û aramî bîyaro’
Baydemîrî bale ant xebatanê yewîye yê Rojavayê Kurdîstanî ser o û vat: “Xebatê yewîya Rojava zî encamêkê prosesê vakurê Kurdîstanî yê. No proses û xebatê yewîye cayê keyfweşî û sipasî yo. Ez reyna sipasîya xo birêz Ocalanî rê erşawena ke no bingeh û îmkanê aştî kewt rojevê Rojhelatê Mîyanênî.”
‘Modelo tewr nêzdî Hewlêr o’
Osman Baydemîrî da zanayene ke seba çareserî, dinya de xeylê modelê nemerkezî est ê û merdim eşkeno seba aştî tira îstîfade bikero û vat: “Ma uca dûrî yo yan Hewlêr? Seba aramî, aştî û ewleyî modelo tewr nêzdî Hewlêr o. Ma Cenevre dûrî yo yan Hewlêr? Hewlêr hîna nêzdî yo.”
‘Wa Hewlêr bibo pirdê mabênê Qamişlo û Anqara’
Baydemîrî peynîya qiseykerdişê xo de vengda rayedaranê başûrê Kurdîstanî û wina vat: “Tena rîcayêka mi est a. Tifaqê xo yê neteweyî xurt bikerê û hukmatê bilez awan bikerê. Hêvîya mi a ya ke Hewlêr bibo Cenevreya Rojhelatê Mîyanênî û wa Hewlêr mabênê Qamişlo û Anqara de bibo pirdêk.”
