Yeno pawitene ke Komîsyon serê hewteyo ke yeno, şêro Girawa Îmraliyî û Rayberê Şarê Kurdî Abdullah Ocalanî reyde pêvînayîş pê bîyaro. Goreyê agahîyanê ke çimeyanê mîyanê prosesî ra ameyê girewtene; kombîyayîş de Abdullah Ocalan do serê xeylê babetan û prosese sazkerdişê qanûnan bivindero û Komîsyonî rê pêşnîyazan bikero.
Komîsyonê Demokrasî, Wayûbirayî û Paştdayîşê Mîllîye vizêr bi rojevê şîyayîşê Girewa Îmraliyî yê pêvînayîşê Rayberê Şarê Kurdî Abdullah Ocalanî reyde kom bi. CHP kombîyayîşê komîsyonî terk kerd û şîyayîşê Îmraliyî red kerd. Serê na babete ra raya pêroyî de vera CHP reaksîyonê tûndî yenê nîşandayene. Raydayîşê Komîsyonî de AKP, MHP, DEM Partî, TÎP û EMEP seba şîyayîşî rayê “eya” xebitnayî. Yenî Yol ne ‘eya’ û ne zî ‘nê’ ray nexebitna, Partîya Demokrat, HUDA-PAR û DSP zî şîyayîş red kerd.
Netîceyê raydayîşî de 32 endamanê Komîsyonî seba ke şêrê Îmrali erê kerd. Seba ke tewr zêde rayî seba şîyayîşî vejîyayî komîsyonî biryar da ke şêro Girawa Îmraliyî û Rayberê Şarê Kurdî Abdullah Ocalanî reyde pêvînayîş bikero.
DEM Partî ra Serekwekîla Grûba DEM Partî û endama Komîsyonî Gulistan Kiliç Koçyîgît, Hetkarê Serekê Pêroyî yê MHP’î Fetî Yildiz nameyê ke dîyar bîyê. AKP ra zî yeno pawitene ke Huseyîn Yayman şîro. Grûba Yenî Yolî ra do kamî biruşnê hema dîyar nîyo la yeno pawitene ke Mehmet Emîn Ekmen şîro. Her wina goreyê agahîyan ganî heme partîyî ewro mîyanê roje de endamanê ke do biruşnê Girawe dîyar bikerê û Komîsyonî agahdar bikerê. Yeno pawitene ke 4 parlamenterê ke endamê Komîsyonî yê, serê hewteyo ke yeno şêrê Girawa Îmraliyî û Rayberê Şarê Kurdî Abdullah Ocalanî reyde pêvînayîş bikerê.
Abdullah Ocalan do xeylê babetan binirxno û pêşnîyazan bikero
Sazbîyayîşê Komîsyonî ra nat şîyayîşê Komîsyonî yê Girawa Îmraliyî bi taybetî hetê DEM Partî, xeylê partîyanê bînan û sazgehan ra ameyêne vatiş û pêşnîyazkerdene. Rayberê Şarê Kurdî Abdullah Ocalanî zî pêvînayîşanê xo yê Heyetê DEM Partî yê Îmraliyî de ardêne ziwan ke o wazeno Komîsyon serdana ey bikero û pêşnîyazanê xo pêşkêşê Komîsyonî bikero. Hetê bînî ra zî dima gamê tarîxî yê Têgêrayîşê Azadîya Kurdîstanî çimê raya pêroyî gameeştişê dewlete de yo.
Kombîyayîş yanî pêvînayîşê Komîsyonî û Abdullah Ocalanî reyde do kamî babetî bêrê nîqaşkerdene zî hetê raya pêroyî ra yeno meraqkerdene. Goreyê agahîyanê ke ma dest vistê; Abdullah Ocalan do serê xeylê babetan, Komîsyonî rê pêşnîyazan bikero. Her wina qerar ame girewtene ke zebitê kombîyayîş-pêvînayîşî zî heta 10 serran nimite bimanê.
Polîtîkayê înkarî yê Têgêrayîşê Azadîya Kurdîstanî
Goreyê agahîyanê ke ma çimeyanê mîyanê prosesî ra dest vistê; Rayberê Şarê Kurdî Abdullah Ocalan do serê xeylê babetan bimano. Abdullah Ocalan do tewr verî behsê polîtîkayanê înkar û çinhesibnayîşî yê vera şarê kurdî bikero û semedanê şerê çekdarî bikero. Abdullah Ocalan do behsê şert û mercanê ke PKK ronîyayo û dest bi şerê çekdarî kerdo bikero û semedanê naye yew bi yew Komîsyonî rê vajo. Abdullah Ocalan do Komîsyonî rê behsê hemleya 15ê Tebaxa 1984î û şerê 50 serran bikero û sebebanê ci yê tarîxîyan vajo.
Rayberê Şarê Kurdî do behsê cigêrayîşanê çareserîye bikero
Her wina ame zanayene ke Abdullah Ocalan do serê hewldan û cigêrayîşanê xo yê seba aştîye û çareserîye yê serranê 90an ra heta nika bikero. Abdullah Ocalan do behsê adirbestê 20ê Adara 1993yî û hûrgilîyanê nê prosesî bikero. Yew babeta ke rojevê Ocalanî de yo zî Komployê Mîyanneteweyî yê 15ê Sibate yo ke vera ey ame kerdene. Ocalan do serê naye bimano û ercnayîş bikero. Ocalan serê hewldananê xo yê çareserîye yê ke serra 2005î ra dest pêkerdo bimano û behsê pêvajoya çareserîye ya 2013î bikero. Abdullah Ocalan do serê cigêrayîşanê çareserîye ke çira nêresayê netîce û sebebanê darbeyan bivindero û nê warî de zî ercnayîşan bikero.
Muhîmîya tifaqa kurd û tirkan
Her wina do yew babeta pêvînayîşî zî tifaqa tarîxî ya kurd û tirkan bo. Abdullah Ocalan do serê pêvajoya çareserîye ya ke 27ê Sibate ra dayo destpêkerdene bivindero û behsê muhîmîya armancê pêvajoya “Aştî û Ko melê Demokratîkî” bikero. Her wina Abdullah Ocalan do serê tifaqa kurd û tirkan zî bimano û serê averberdişê tifaqî ercnayîş û pêşnîyazan bikero.
Her wina destpêkerdişê prosesî ra nat yew babeta ke tewr zêde yene rexnekerdene zî ziwanê medya û sîyasetmedaranê tirkan ê vera prosesî yo. Yeno pawitene ke kombîyayîş de Abdullah Ocalan serê naye zî bivindero. Ocalanî pêvînayîşanê xo yê heyetê DEM Partî reyde zî destnîşan kerdbi ke ganî medya û sîyasetmedarî fek ziwanê ke goreyê ruhê prosesî nîyo ra veradê û bi ziwanêko pozîtîfî qisey bikerê. Ocalan do kombîyayîş de serê naye bivindero û pêşnîyazanê awankerdişê ziwanê Aştî û Komelê Demokratîkî bikero.
Amadekarîyê qanûnî û entegrasyonê demokratîk
Xusûsen çimê şarê kurdî û raya pêroyî dewlete de yê ke do hetê qanûnî ra kamî gamî bêrê erştene. Goreyê agahîyanê ke çimeyan dayê; Abdullah Ocalan do kombîyayîş de serê na babete zî bivindero. Bi taybetî zî do serê rewşa gerîlayan ke çekî ronayê û do senî tewrê sîyaseta demokratîke bibê bivindero. Her wina Abdullah Ocalan do behsê muhîmîya heqanê kurdan bikero ke do senî heqê înan bêrê mîsogerkerdene. Abdullah Ocalan do serê azadîye, yewbîyayîşê şarê Kurdî qiseykerdiş û ercnayîşan bikero û do serê entegrasyonê demokratîkî bivindero. Yew babeta tewr muhîme ya kombîyayîşî zî mîsogerîya heqanê şarê kurdî ya û Ocalan do nê warî de pêşnîyazanê xo pêşkêşê Komîsyonî bikero.
Rapor do 28ê Teşrîna Peyêne de bêro amadekerdene
Komîsyon do dima ke goş da Abdullah Ocalanî derbazê beşê pers û cewaban bibo, persanê xo Ocalanî ra bikero. Komîsyon do dima nê pêvînayîşê tarîxî û muhîmî prosesê goşdarîkerdişî biqedîno. Dima do Komîsyon raporêk amade bikero. Komîsyon do heta 28ê Teşrîna Peyêne roja Îne seba amadekerdişê raporî agahî bido Serekîya Meclîsî.
