Verfeka DEM Partîye Ayşegul Dogan bal ant ser kombiyayîşê Komîsyonî yê 4ê Kanûne û va ke wa tutanaxê pêvînayîşê ke Abdullah Ocalanî reyde ameyê kerdene, raya pêroyî rê akerde bibê.
Vervatoa Partîya Têduştî û Demokrasîyî ya Şaran (DEM Partî) Ayşegul Dogan, merkezê pêroyî yê partîya xo de derheqê averşîyayîşanê rojdemî de ercnayîşî kerdî.
Ayşegul Dogan ke bala ant Teklîfê Qanûnê Butçeyê Îdareyê Merkezî yê 2026î ser ke Komîsyonê Plan û Butçeyî de yeno nîqaşkerdene va ke Tirkîya de polîtîkayî, şîdetê vera cinîyan û bêcezahîye teşwîq kenê.
Ayşegul Dogan dîyar kerd ke cinîyî nê ra raşt zî naye qebul nêkenê û tewr verê cû seba aştîye, demokrasî û edaletî tewr vernî de xoverdayîşê xo domnenê.
Ayşegul Dogan bal ant ser pêvînayîşê ke Komîsyonî Rayberê Şarê Kurdî Abdullah Ocalanî reyde kerdo û dîyar kerd ke Abdullah Ocalan muxatabo verên o û çarçewaya çareserîya mesele de reya verêne ya ke pêvînayîşêko winasî yeno kerdene û wina qisey kerd: “Ma heta ewro vatêne ke no dîyalog do bibo dîyalogêko winasî ke hêz bido prosesî. Naye ra pey zî ma do pîya bivînê ke do senî hêz bido. Ma do pêro pîya naye rê şahidîye bikerê. Lazim o ke raporê Komîsyonî zaf lez biqedîyo û Meclîs de derheqê serrastkerdişanê huqûqîyan de bêro caardene.”
Ayşegul Dogan dîyar kerd ke pêvînayîşê ke Abdullah Ocalanî reyde ameyê kerdene ganî raya pêroyî rê bêrê vilakerdene û wina dewam kerd: “Seba komelîbîyayîşî zaf muhîm o. Hûrgilîyanê ci ma do kombiyayîşê komîsyonî yê 4ê Kanûne de bimusê. Û reyna pawitişê ma o yo ke nê tutanaxî raya pêroyî rê akerde û resaye bê. Heta ewro tutanaxê goşdayîşanê ke ameyê kerdene senî ke raya pêroyî ya Tirkîya key waşt bi serê tora înternetî ya Meclîsê Tirkîya ra resaye ci, ganî na çarçewe de tutanaxê pêvînayîşê ke endamanê komîsyonî, Îmrali de Birêz Ocalanî reyde kerdê zî, eynî tewir bibê. Ganî na babete de şefafîye ra tawîz nêdîyo.”
Ganî pêvînayîşî dewam bikerê
Ayşegul Dogan qiseykerdişê xo wina qedîna: “No pêvînayîş muhîm bi, la ganî tena nêmano, no zî hendê ci muhîm o. No gamê sîyasî yo ke rayîrê Îmrali bi awayêko resmî akerd, ganî dewamê ci bêro. Îmkanê pêvînayîşê bi Birêz Ocalanî reyde ganî hîra bibê. Ma seba ameyoxê prosesî naye muhîm vînenê. Temsîlkarê cîya-cîya yê sîyasîyî, heqpawitî, akademîsyenî, rojnamegerî, kam wazeno şiro temas ronê, kam wazeno şiro uca de ey reyde pêvînayîş biko, ganî bikîro, eşkera bibo, ganî îmkanê naye bêrê afernayîş. Key ke ma nê hetî ra nanê pa ke gîyanî vîndî nêbê, no meseleyêka ciwîyayîşî ya. Çîyêk naye ra bîqîmetêr, naye ra fîrazêr çîn o. Coka cayê ke merdim nînan bi weçînayîş, pîvana weçînayîşî, anketan an zî qerqilanê ke nînan ser o yenê organîzekerdene îzah biko, ganî merdim nê cayî ra biewnîyo na mesele ra. Ser o zî, ganî merdim bi xo planê tarîxî yê na mesele û dîmenê bînî yê sosyolojîkî ke heta ewro vejîyayê werte, înan reyde rî bi rî bibo. Seba çareserîya demokratîke ya meseleya kurdî ganî merdim vizêr ra cîya yew tewir nîşan bido. Yanî key ke ma vanê wa o qalibê verênî bêrê şiknayene, ganî ma naye tenya qiseyan de nêverdê, pratîk de zî bikerê. Hetêk ra no mesele meseleyêk o ke ganî ma hewaleyê berjewendîyanê partîyan ê basîtan nêkerê, heto bîn ra zî meseleyêk o ke ganî merdim cîddî û tarîxî nêzdî bibo. Hem îqtîdar hem muxalefet ganî gamê cesûrî bierzê û partîyê sîyasî yê ke bêveng manenê ganî kes û komê bînî zî teşwîq bikerê. Muxalefet zî ganî sîyasetê ‘bipawe û bivîne’ ra cîya, pozîsyonêkê aktîfî bigîro û bibo wayîrê ufqê sîyasetê awankerî. Seba serbest veradayîşê Selahattîn Demîrtaşî se yeno pawitene? Şima çira na rewşa sucî rê sey temaşekaran manenê? Ma dibare kenê. Sere de Selahattîn Demîrtaş û Fîgen Yuksekdag, pêro tepişteyê dewaya kumpasî ya Kobanê ganî serbest bêrê veradayene. Qerarê Mehkemeya Heqanê Merdiman a Ewropa û qerarê Mehkemeya Qanûnê Bingeyîn ganî bêrê caardene. Êdî lazim o ke na rewşe rê peynî bêro dayene.”
