Avûkat Muharrem Şahîn va ke ganî her kes ziwanê aştî bipawo û wina va: “Ma ziwanê aştî bivînê, yew rayîrê ma çin o. Rayîrê ma, rayîrê aştî û azadîye yo. Sewbîna rayîr de ma nêeşkenê ciwîyayîşê xo bidomnê. Ma bi reng û tewirê xo tewrê nê prosesî bibê, paştî bidê ci ke wa aver şîro.”
Rayberê Şarê Kurdî Abdullah Ocalan 27ê Sibate de vengdayîşê Aştî û Komelê Demokratîkî kerd. Na çarçewe de PKK’yî zî xo fesix kerd û tewr peyên zî Rayberîya Hereketê Azadîye yê Kurdîstanî çarçeweya qeraranê Kongreya Partîya Karkeranê Kurdîstanî (PKK) ya 12. de, 26ê teşrîna verêne de herêma Qendîlî de eşkerayîyêk daye û gerîlayê xo yê ke vakurê Kurdîstanî de yê, ê pey de antê. Na babete ser o zaf munaqeşe û şîroveyê ameyê kerdene.
Avûkatê verênî yê Rayberê Şarê Kurdî Abdullah Ocalanî Avûkat Muharrem Şahînî derheqê prosesî de ajansê ma rê qisey kerd.
‘Kulturê Dewleta Tirkan de demokrasî çin o’
Avûkat Muharrem Şahînî vat ke wexto ke derg Rayberê Şarê Kurdî Abdullah Ocalan, ne pawitoxanê xo reyde ne zî keyeyê xo reyde nêeşkayêne pêvînayîş bikero û wina va: “Çi heyf ke nêverdayêne çew şîro, hema hema beno 15 serrî. Nika orte de sewbîna rewşêk est a, Rayber Apo hewl da rewşêka est a, bivurno. Prosesêko newe da destpêkerdene, nika şîyayîş û ameyîş est o la no nîno maneyê tecrîd qedîyayo. Tecrîd hema zî dewam keno. Partîya Karkeranê Kurdîstanî (PKK) xo fesix kerd, vejîyayî teberê welatî û vat, ‘ma do nika ra pey lej nêkerê.’ Çi heyf ke dewlete game nêeşta la na aştî do biba. Dewleta Osmanî ra nika Dewleta Tirkan de kulturê demokrasî çin o, Dewleta Osmanîyan şîyêne dest dayêne cayêkî ser o û nê kulturê înan hetanî rijiyayîşê dewleta înan dewam kerd.”
Muharrem Şahîn eşkera kerd ke Komara Tirkîya zî demek awan bîye, komare zî va ke şarêkî mîyanê nê dewlete ciwîyenê do hemînan tirk bikerî, tirkî qisey bikerî û yew bibê miletêk û nê çîyê vatî: “Yew ziwan û yew dîn. Heta nika na polîtîkaya înan serkewte nêbîye, ma demo ke dinya ra ewnîyenî dewletêka demokratîke biba yew şarî ra hîna vîşî yê. Ma vînenê polîtîkaya yewkerdişî mîyanê dewletêk de biba, mîyanê a dewlete de lej vejîyeno û rijîyena. Bol însanî mirenê, no ser zî ganî ma paştî bidê nê prosesî û ey aver berê. Êdî heqê kurdan zî ganî bêrê dayene, bol û bi hezaran însanî ewro hepisxaneyan de keyfê yenê girewtene. Cezaya înan zî qedîyaya la reyna zî veranêdanî, êdî sewbîna şensê Tirkîya çin o.”
‘Yew rayîrê ma çin o, rayîrê ma, rayîrê aştî û azadîye yo’
Şahînî dîyar kerd ke seba serbestmendişê girewteyanê sîyasî bedilnayîşê qanûnê neweyî lazim nîyê û wina domna: “Qanûnanê nikayî reyde zî eşkenî bikerî. Komare wina nêkera averşîyayîş nêbeno. Merheleyêka ma ameyê qandê însanan rind a, no ser ganî ma wayîr bivejî û aver berê. Nê prosesî tena kurdan rê nê, ma heme şaran rê bidê fehmkerdiş. Ma demo ke Îran, Îraq û Sûrîye ra ewnîyenî, înan de zî hiqûq çin bi, demokrasî çin bi; netîce orte de yo. Ganî ma ziwanê aştî bivînê, yew rayîrê ma çin o, rayîrê ma, rayîrê aştî û azadîye yo. Sewbîna rayîr de ma nêeşkenê ciwîyayîşê xo bidomnê. Ma bi reng û tewirê xo tewrê nê prosesî bibê, paştî bidê ci ke wa aver şîro.”
‘Bi şîyayîşê Komîsyonî dewlete hîna bena saxlem’
Şahînî bal ant şîyayîşê Komîsyonî yê Îmraliyî ser o û wina va: “Şîyayîşê Komîsyonî yê Îmraliyî de şaşîyêk çin o, bol weş bi. Bi şîyayîşê Komîsyonî dewlete bena hîna saxlem. Ma heme vatişê ke ameyê vatene, dîyê ke raşt nîyê. Tena şîyayîşê Komîsyonî qîm nêkeno, Komîsyonî şi pêvînayîşê xo kerd. Ûca de çi ameyo qiseykerdene do bîyarê Meclîsî. Ma texmîn kenê ke çi ameyo qiseykerdene, qandê aştî û azadîye yo. Bi şîyayîşê Îmraliyî, dewlete zî nêrijîyena, hetta hîna vîşî şîrê. Ganî partîyê binî şîrê Îmrali. Kam nê prosesî rê qayil nêbo do binê prosesî de bimano. Çi heyf ke kulturê na dewlete de demokrasî çin o, no ser zî nêzanî demokasî do çiqas rind ba. Şarê heme bi reng, veng û kulturê xo biciwî çiqas rind o, wina dewlete hîna rind, dewlemend û gird bena.”
‘Qanûnê nikayin zî seba gameeştişî bes ê’
Şahînî dîyar kerd ke nika ra pey ganî dewlete gaman bierza, çike kîşta hiqûqî de gameeştişê bolî yê û nê çîyê vatî: “Nika hepisxanayan ra serbestveradayîşê girewteyanê sîyasî rê qanûnê newe lazim nîyê, qanûnê nikayinî zî gameeştişî rê bes ê. Wa Komîsyon Îmrali de çi ameyo qiseykerdene, heme welatî ra vajo. Zerarê ci dewlete rê çin o, şaranê Tirkîya rê zerarê ci çin o. Ma paştî danê nê prosesî û ganî proses zî aver şîro. Ganî bi lezûbez dewlete wezîfeyê xo bîyara ca. Ganî muameleyanê keyfî ra zî fek veradê, dosyayê keyfî ameyê akerdene zî wa bêrê girewtene. Seba ziwanê dayîke bibo ziwanê perwerdeyî wa qanûnê bingeyînî de bedilîyayîşan bikerê.”
‘Prosesêko bol rind o’
Muharrem Şahînî îfade kerd ke wa nê prosesî rê wayîrîne bêra kerdene û qiseyê xo wina qedînayî: “Goreyê mi AKP’yî ra pawitişê rolîgirewtişî yê prosesî ganî nêkeno. Hem şar hem zî DEM Partî do nê prosesî rê wayîr vejîyê. Wa DEM Partî zî şîra mîyanê komelî û vaja no prosesêko bol rind o. No proses eke aver nêşîro ma do heme zerar bivînê. Ma ganî hem komelê Kurdîstanî rê hem komelê Tirkîya rê zî vajê. Ma heta pêroyîya dinya ra zî vajê. Rayber Apo eke no proses ardo hetanî ewta, ma zî no proses rê wayîr bivejê. Ma no proses tena înan rê nêverdî. Ma înan mecbûr verdê, ma tena înan ra nêpawî.”
