Sîyasetmedar û nuştox Hasan Ozguneşî va ke firsendo tarîxî kewt destê kurdan û vera her çî ganî pê yewîyêka xurte wayîrê Rojawa vejîyê.
Ozguneşî derheqê vurîyayîşanê Sûrîye, hêrişanê dewleta tirke û nobetê sinorî de qisey kerd. Ey bale ant ke dewletê nîjadperestî nêşenê xo bibedilnê û va: “Dewletê ke bingeyê yew bawerî û neteweyî ser o ameyê awankerdene, nêşenê xo bikerê demokratîk. Nêşênê bibê dewletê huquqî, azadîwazî û problemanê komelê xo çareser bikerê.”
‘Rojhelatê Mîyanênî de krîzêko xorîn est o’
Ozguneşî dîyar kerd ke hêzanê emperyalîstan seba ke Îsraîlî rê tehluke dîyo, Îranî ser o hêrîş kerdo û wina dewam kerd: “Nika rewşa Sûrîye de ma şênê vajê ke Rojhelatê Mîyanênî de krîzêko xorîn est o. Nika Durzî, Suryan, Ermen, Xirîstîyan, Êzidî û Kurdî binê tehluke de yê. Ma zanê HTŞ û ANS de tu wîjdan, exlaq, demokrasî, azadî, seypêyî, heqê cinîyan û heqê merdiman çin o.”
‘Çareserî neteweyê demokratîk o’
Ozguneşî va ke tena hêzo ke wayîrê tecrube yo Îdareyo Xoser û Hêzê Sûrîyeya Demokratîk ê û wina dewam kerd: “Îdareyo Xoser 13 serrî yo ke bi fehmê neteweyê demokratîkî Bakur û Rojhelatê Sûrîye îdare keno. Hemê şarî û bawerî, cinî bi hawayêko azad uca de ciwîyenê. Tena çareserî no model o.”
‘Ewro firsendê muhîmî vejîyayê’
Ozguneşî peynî de va: “Ewro firsendê muhîmî vejîyayê, dostê ma zaf bîy, hîsêko neteweyî est o û firsendêko tarîxî est o. Ganî her kes bê her çî biko yew het hem bibo yew hem zî wayîrê Rojawa bivejîyo. Serkewtene nêzdî ya.”
