Cagirê Hemserekanê Pêroyî yê Partîya DEMî Tayîp Temel o ke Çapemenîye ra Berpirsîyar o, derheqê Konferansê “Aştî û Komelê Demokratîkî yê Mîyanneteweyî” de dîyar kerd ke xeylêk welatanê dinya ra kesayetê namdarî do tewrê konferansî bibê û vat ke ê ser o xebetiyenê ke Îlham Ehmed zî tewrê konferansî biba.
Partîya Têduştîye û Demokrasî ya Şaran (DEM Partî) do 6-7ê Kanûne de Îstanbul de Konferansê “Aştî û Komelê Demokratîkî yê Mîyanneteweyî” organize bikera. Yeno pawitene ke Kurdîstan, Tirkîya û xeylêk welatanê dinya ra kesayetê namdarî tewrê konferansî bibê. Konferans de prosesê “Aştî û Komelê Demokratîk” o ke hetê Rayberê Şarê Kurdî Abdullah Ocalanî ra ameyo destpêkerdene, do bêro munaqeşekerdene. Bask ra heta Afrîka, Qazaxistanî ra heta Belçîka xeylêk kesî do bêrê û tewrê konferansî bibê. Her wina rêxistina Sînn Feînî ya Îrlanda zî do tewrê konferansî biba.
Cagirê Hemserekanê Pêroyî yê Partîya DEMî Tayîp Temel o ke Çapemenî û Propaganda ra Berpirsîyar o, derheqê konferansî de Ajansê Welatî rê qisey kerd.
Xeylêk kesayetê namdarî tewr benê
Tayîp Temel ard ziwan ke armancê destpêkerdişê prosesê “Aştî û Komelê Demokratîk” o yo ke kurd û neteweyê cîya nêrê înkarkerdene û wina vat: “Proseso tarîxî 27ê Sibate ra heta roja ewroyî dewam keno. Tewr peynî Komîsyonê Meclîsî zî şî bi Birêz Ocalanî reyde pêvînayîşî pê ard. No proses ma rê vano; ‘Ma demêkê neweyî de yê, seba şarê Kurdîstanî xeylêk taybetmendîyê ci estê’. 27ê Sibate ra nat xeylêk fîlozofê mîyanneteweyî, nuştox û roşnvîrê ke Xelata Nobelî girewta, hema vajê derdorê 120 kesanê namdaran paştgirîya xo seba vengdayîşê Birêz Ocalanî dîyar kerde. Xeylê înan zî vat eke proses bi serkewtiş netîce bibo, ganî Birêz Ocalan sey namzetê Xelata Nobelî bêro nîşandayene. No zî yeno manaya ke no proses seba şarê kurdî xususîyetanê taybetan zerrîya xo de hewêneno. Çîke dinya de paştgirîyêka pîle est a. Kesê sey Slavoj Zizek, Norman Paech û xeylêk marksîstê Rojhelatê Mîyanênî û qadê mîyanneteweyî paştgirîya xo seba fikr û ramanê Birêz Ocalanî nîşan daye. Ma wazenê bi nê konferansê 6-7ê Kanûne tayê babetanê ke nê prosesî de yê, bi awayêkê eşkerayî bêrê munaqeşekerdene.”
Armanc û tedeyîya konferansî
Tayîp Temel derheqê tedeyî û armancê konferansî de zî agahîyî dayî û wina dewam kerd: “Huqûqnasê namdarî yê dinya nê prosesî perspektîfêkê senî de vînenê, fîlozofê ke xeylêkê înan sosyalîst ê, fikrê prosesê Komunanê Demokratîkan yê Birêz Ocalanî senî ercnenê? Nûmûne huqûqnasê namdarî yê sey Mohammed Rauf û ê bînî seba ‘heqo hêvîye’, seba azadî û serbestîya birêz Ocalanî çi vanê? Heqo hêvîye, heqêko gerdûnî yo. Seba aye zî ma wazenê nê babetan pêroyî bi nê konferansî, bi paştgirîya xeylê çimdarîyan, nê ke tena goş bidê beşdaranê qisekerdoxan, her wina wa nê babetî bêrê munaqeşekerdene.”
Mesajê Abdullah Ocalanî zî do bêro wendene
Tayîp Temel dîyar kerd ke amadekarîyê konferansî dewam kenê û vengdayîşê seba tewrbîyayîşê kesayetanê namdaran zî dewam keno. Tayîp Temelî ard ziwan ke çerçewaya konferansî êdî dîyar a û wina qisey kerd: “Belçîka ra huqûqnasêko namdar Georges Dallemagne yeno. Norman Paechî zî serê aştî û vinderdişê şerî û serê huqûq û azadîye de fikr û ramanê ey ê hîrayî est ê, o zî yeno tewr beno. Xeylê huqûqnasê namdarî yenê. Laura Boldrini zî zelal bîya, a zî do bêro. Huqûqnasêko marksîst John Holloway ke wayîrê berhemanê girîngan o zî yeno. Herêma Baski ra Îgor Zulaika yeno. Sey ke yeno zanayene, Bask de prosesê aştîye xeylêk rey raştê astengîyan ame û mend, seba serpêhatîya Baski zaf girîng o, o zî do seba na babete bêro. Mesajê Birêz Abdullah Ocalanî zî do hetê Veysî Aktaşî ra bêra wendene. Armancê ma yê konferansî o yo ke ma û beşdaranê konferansî ano têhet. No konferans do bi tedeyî û beşdaranê xo tesîr prosesê ‘Aştî û Komelê Demokratîk’ o ke Kurdîstan û Tirkîya de ameyo destpêkerdene, bikero. Netîcenameyêk zî do seba konferansî bêro nuştene. No netîcename zî do xebatanê qadê mîyanneteweyî û çerçewaya xebatanê dîplomatîkan dîyar bikero.”
Yeno pawitene ke Îlham Ehmed zî tewrê konferansî biba
Tayîp Temel da zanayene ke ê mîyanê hewldan û xebate de yê ke Hemsereka Daîreya Têkîlîyanê Teberî ya Îdareyê Xoserî yê Vakur û Rojhelatê Sûriye Îlham Ehmed zî bêro û tewrê konferansî biba û qiseykerdişê xo wina domna: “Eke şert û mercê aye pê bêrê, do Îlham Ehmed serê nameyê Îdareyê Xoserî yê Rojawanê Kurdîstanî tewrê konferansî biba. Labelê eke astengîyê huqûqî wurzê. Labelê eke nêşîro bêro tîya beşdar biba zî, do mesaj bierşawa yan zî bi telekonferans tewr biba. Xeylêk kes û kesayetê namdarî ke ma nika nameyê înan eşkera nêkenê zî do bi rayîrê telekonferansî tewr bibê.”
‘No konferans do seba qadê mîyanneteweyî zî firsendan awan bikero’
Tayîp Temel destnîşan kerd ke konferansî ra dima zî xebatê înan do dewam bikerê û qiseykerdişê xo wina qedîna: “Xebatêka enternasyonal ameya destpêkerdene. Bingeyê na xebate o yo ke; fikr û ramanê Rayber Ocalanî, newe ra pênasekerdişê marksîzmî û şîroveyê sosyalîzmî pêro dinya de senî rastê eleqeyêkê pîlî yenê. Sosyalîzm bi binbiyayîşê sosyalîzmê realî kewt mîyanê krîzî. Krîzêko zerrî. Kapîtalîzmî zî hêrişêko pîl pêro komelanê dinya ser o rayra berd. Xoverdayîş û helwestê sosyalîstan vera nê çîyî de, hewceyê pesnî yo labelê teorîya sosyalîstan hetê birêz Ocalanî ra newe ra yena şîrovekerdene. Teorîya çînî, teorîya dewlete û netew-dewletan zî newe ra ercneno. No konferans do o firsendî seba qadê mîyanneteweyî bivejo werte ke fikr û ramanê birêz Ocalanî ra agahdar bibê. Xora eleqeyêko pîl zî esto. Ez bawer kena ke demê ke yenê de, qadê mîyanneteweyî de do xebatêka pîla enternasyonale bêra organîzekerdene. Ma do qadê mîyanneteweyî ra veng bidê Tirkîya û nê fikr û ramananê birêz Ocalanî ra agahdar bibê û zemînê ameyoxê enternasyonalî xurt bibo. Xebatê dîplomatîk û mîyanneteweyî bi netîcenameyê nê konferansî do xurttir bibê. Vengdayîşê ma o yo; kesayetê ke ma ê dawet kerdê yan zî nêkerdê, ê ke nê kesayetanê namdaran nas kenê, fikr û ramanê înan meraq kenê, wa 6-7ê Kanûne de konferans de bibê. Ma wazenê kesê ke konferansî teqîb kenê û tewr benê, nê ercnayîşan ra hawil bigêrê.”
