Awa Şampaşa ya dewa Femeyî ya ke girêdayeyê Yedîsuya Çewligî ya, muxtarê dewe seba ke bieşko awe biroşo, wazeno uca de fabrîka virazo. Muxtarê dewe seba ke dewijan îqna bikero bi fekê rayedaranê dewlete dewijan rê telefon keno û ferman dano înan ke viraştişê fabrîka qebul bikerê. Dewijanê Şampaşî û Femeyî dîyar kerd ke ê nêwazenê fabrîka virazê.
Awa Şampaşa ke girêdayeyê Yedîsuya Çewligî ya, awêka namdar û weşe ya. Feydeyê na awe dewijanê dewe rê zaf est o. Dewijî ke sukan ra agêrayê dewa xo û ci rê wayîr vejîyenê, pê na awe hêgayanê xo awedanê, pezê xo awedanê û pê naxirê xo weye kenê. La muxtarê na dewe çim esşto na awe û wazeno na awe ser o fabrîka virazo. Dewijê na dewe nêwazenê ke na fabrîka virazîya.
Bi fekê rayedaranê dewlete dewijan tersneno û îmza gêno
Goreyê agahîyanê ke ma çimeyanê bawerî ra girewtê, muxtarê dewe seba ke dewijan û azayanê dewe îqna bikero tewir bi tewir kayan kay keno. Goreyê vatişanê çimeyanê ma muxtarê dewe seba ke azayêkê dewe îqna bikero, bi fekî Hetkarê Serekkomarê Tirkîya Cevdet Yilmazî azayê dewe rê telefon kerdo, xo sey Cevdet Yilmaz dayo şinasnayene û azayî ra waşto ke seba viraştiştişê fabrîka îmza bido. Ney ser o azayê dewe tersayo û seba viraştişê fabrîka îmza daya. Eynê wextî ame vatene ke Qeymeqamî qeza zî paştî dano muxtarî ke fabrîka virazo.
Fabrîka baxane ya amanc zerrn ê
Reyna goreyê agahîyanê ke çimeyanê bawer û dewijan ma reyde pare kerdê dewa înan de kanê zernnan est ê û muxtarê dewe û kesê ke paştî danê ey fabrîka xo rê baxane, esas amancê înan akerdişê kananê zerrnî yo. Goreyê vatişanê dewijan bi viraştişê fabrîka do qada înan hîra biba û dima ra do bi hewayêko rehet kananê zerrnî akerê.
Dewijanê ke agahîyê kananê zernnî dayê ma seba ewleyîya xo nêwaşt bi vîdeo qisey bikerê. La tayê dewijan babete viraştişê fabrîka ser o ajansê ma rê qisey kerd.
‘Eke na awe şîra ma do senî weşîya xo biramnê’
Dewa Şampaşa ra Ersîn Demir wina dest bi vatena xo keno: “Ez na dewe de nîsona ro, mal û naxire mî est o, ma nêwazenîme dewa ma de fabrîkaya awe virazîya. Ma yenîme na awe sîmenîme, hêgayan awe danîme, fabrîka kî virazîya çi feydeyê xo est o ma rê. Sûkanê pîl de nêvîndertîme, ameyîme dewa xo, nika kî na fabrîqa ameye verê ma. Naxirê xo ûsar anê û heta payîzî na ware de çernenîme. Na awe kî berê, naxir çî weno. Wazenîme ke gencî bêrê dewa xo, cayê xo rê wayîr vejîyê. Na awe yê jan û dewa ma ya, nêwazenîme fabrîka virazê.” ‘Awe ma jarê ma ya’
Ana Zorya ke dewa Şampaşa de ronişena, na fabrîka ser o vana ke: “Na awe jarê ma ya, ma some serê awe de nîyaz vila kenîme, awe ma rê bes a, ma fabrîka nêwazenîme.”
‘Ma re awe bîyare, merosê’
Dewijê dewa Şampaşa ra Ender Demîr, na awe ser o wina vano: “Awa ma werdena çin a, na awe werdena ma rê bîyarê. Ma nêwazenîme awe ma biroşîya, şêra teber. Awe, awa heqî ya, wa kes towa mekero. Çîme awe bîyo şa, awe keş çîna, ma nêwazenîme.”
‘Awa ma de maseyî est ê, awe ke şîra maseyî zî nêmanenê’
Dursun Demîrî kerd ke awa înan maseyî est ê û wina domna: “Nêwazenîme ke awa ma berê uca de fabrîka akerê. Uca de hêgayê ma est ê, merxê ma est o, mal û naxirê ma est o. Awa ma de maseyî est ê, awe ke şîra maseyî zî qedîyenê. Awe benê ça? Naxir bêawe maneno, hêgayİ bene hûsk, ma nêwazenîme.”
‘Awe ser ke fabrîka vîrazîya ma rê towa nêmaneno’
Dewa Feme ra Seydalîyê Bexiz, hetê ra naxirê xo çerneno, hetê ra vano ke: “Fabrîka ke viraşte malê ma nêsono uca. Dormeyê ucayî gênê, gem kenê xirabin. Êyê ke tapuyê xo est o, çîyêdo senik danê ci. Feydeyê fabrîka kesî re çin o, ma ke nika şîme ça Ewnî aqay de awe vajîme danê ma, nika ke fabrîka virazîya ma rê awe nêdanê.”
‘Awa dewa ma zaf pak a qilêrin mekerê’
Dewa Feme ra Erkan Keskîn ke nêzdîyê awe de mêşnayan weye keno, awe ser o wina vano: “Ez mêşnayan keme weye. Mal û naxirê ma est o, janê ma est o, ramemê, keme weye, mesê mi est o. Awa ma zaf kêmî ya, nika vanê sere awe de fabrîka virazîme, awe biroşîme. Nê welatê ma de awe kêmî ya. Awa cîranan kêmî ya. Sarê ma tever der ê, dûrî der ê, ûsar ke bî yenê dewa xo. Vane ma hêgayanê xo biramîme, nan virazîme, neheyan biramîme. Dewijê ma perûne cayê xo rê wayîr vejîyene. Sarê ma nêwazeno na fabrîka virazîya. Tever ra yenê, mordeman vînenê û wazenê ke awe berê, biroşê. Na awe teyna ma rê bes a. Nêwazenîme, dewa ma pak a, rindek a, dewijê ma nêwazenê. Ma na dawa xo ra peyser nêvîndenîme.”
