Rojnameger Hakki Boltan serrgêra bombakerdişê rojnameyê Ozgur Ulke yo 33. de rojnameger Ersîn Yildiz o ke amebi kiştene yad kerd û vat: “Ozgur Ulke roşnîya raya pêroyî bi.”
3ê Kanûna 1994î de Stenbol de yew Anqara de hîrê awanîyê Rojnameyê Ozgur Ulkeyî ameyê bombakerdene. Teqîyayîşê Stenbolî de xebatkarê Ozgur Ulkeyî rojnameger Ersîn Yildiz cuya xo vîndî kerde û 23 xebatkarê Ozgur Ulkeyî birîndar bîyê. Serrgêra bombakerdişê rojnameyê Ozgur Ulkeyî yo 33. de Ersîn Yildiz ewro yeno yadkerdene. Rixmê bombakerdiş, kiştiş, girewtiş û zilmî zî kulturê Çapemenîya Azade gamêk zî apey game nêeşte û her rojnameyê rayîrê Ozgur Ulkeyî ser o heqîqetî resna. Hemserekê YEW-KURD’î rojnameger Hakki Boltan bi munasebetê serrgêra bombakerdişê Ozgur Ulkeyî qisey kerd.
‘Ozgur Ulke mîyanê adirî de kar û xebatê xo kerdêne’
Hakki Boltanî dîyar kerd ke rojnameyê Ozgur Ulkeyî seba şarê kurdî wayîrê cayêko muhîm bi. Hakki Boltanî behsê roja bombakerdişê rojnameyî kerd û wina vat: “Rojnameyê Ozgur Ulke rengêko newe vetbi, no reng zî rengê Çapemenîya Azade bi. Çapemenîya Azade rê pêşengîyêka xurte kerdêne. Raya pêroyî ê rojanê sîya û tarî de bi xeberanê Ozgur Ulkeyî roşnî bîyêne. Bêtehemulîyêka girde hemverê kurdîtîye û têkoşînê kurdîtîye bîye. Nêwaştêne ke têkoşîn, heq û lazimtîyê kurdîtîye hetê kurdan ra bêrê zanayene û fehmkerdene. La Ozgur Ulkeyî seba nê heqîqetan bêmabên bi hewayêko xurt mîyanê adirî de kar û xebatê xo kerdêne.”
‘Dewlete seba bertarafkerdişê Ozgur Ulkeyî qerar dabi’
Hakki Boltanî bale ant polîtîkayanê dewlete yê ke vera şarê kurd û Çapemenîya Azade rayra berdêne û bombakerdişê Ozgur Ulkeyî de behsê rol û mîsyonê serekwezîra ê wextî Tansu Çîllerî kerd. Hakki Boltanî wina dewam kerd: “Tewr peyên 3ê Kanûna 1994î de Ozgur Ulke ame bombakerdene. Êdî înan vatêne ‘ma qedîna, Çapemenîya Azade êdî çin a.’ Xora raporêkê înan û telîmatêkê înan ê o wextî est bi. Hetê Serekwezîra ê wextî faşîst Tansu Çîller ra amebi dayene. 15 rojî dimayê bombakerdişî vejîya orte. Vatbi, ‘Şima do nê rojnameyî bertaraf bikerê.’ Wina ferman dabi.
‘Bi kiştişê Ersînî nêresayê amancê xo’
Rojnameger Hakki Boltanî, Ersîn Yildiz yad kerd û diyar kerd ke waştêne bi qetilkedişê ey rojnamegerê ke bi pîvananê Çapemenîya Azade xebitîyenê orte ra wedarnê û wina vat: “Embaz Ersîn Yildiz nê hêrişî de şehîd bi. Şexsê Ersîn Yildizî de waştêne ke rojnamegerî û rojnamgerê ke rayîr û pîvananê Çapemenîya Azade rayra şonê, orte ra wedarnê. La bi kiştişê embaz Ersînî û yê ke sey ey ameyê kiştene xo rê sey nimûne gênê û rayîrê înan de rayra şonê. Ewro zî ma Naziman ra bigîre heta Cîhanan, Apê Mûsa ra bigîre heta Huseyînan şexsê embaz Ersînî de vernîya şehadetê înan de beşna xo tewînenê. Eşkerakerdişê heqîqetî bi tu hewayî tarî de nêmaneno.”
