Bi pêşengîya Platformê Hîşyar Be, 14ê Kanûne de Licê de vera fuhuş û tiryakî rayşîyayîşêk do bêro virazîyayene. Sîyasetmedar û îdarekarê sazîyanê sivîlan seba tewrbîyayîşê rayşîyayîşî veng da şarî û va: “Wardê ser payan û wayîrê Licê vejîyê. Ma do vera fuhuş û tiryakî rayra şêrê.”
14ê Kanûne de Licê de bi şîarê “Ma rê neydanê tiryak, fuhuş û şerê taybetî” rayşîyayîşêk do bêro organîzekerdene. Rayşîyayîş bi pêşengîya Platformê Hîşyar Be do bêro kerdene û xeylê sazî û dezgehî tewrê rayşîyayîşî benê. Hemsereka Pêroyî ya Partîya Herêmanê Demokratîkan (DBP) Çîgdem Kiliçgun Uçar zî do tewra rayşîyayîşî biba. Seba rayşîyayîşî amadekarîyî yenê kerdene û veng dîyeno şarî ke tewrê ci bibo.
Hemserekanê Rêxistina DEM Partî ya Qezaya Licê û îdarekaranê sazîyanê sivîlan veng da şarî ke tewrê rayşîyayîşî bibê û va ganî herkes wayîrê Licê vejîyo.
‘Ganî şarê Licê wurzo ser payan’
Endama Komeleya Hetkarîya Keyeyanê Tepişte û Hukmdaran (TUAY-DER) ya Amedî Yesure Tufan dîyar kerd ke ê do 14ê Kanûne de vera fuhuş û tiryakî rayra şêrê û vat: “Ez veng danê pêro şarê Licê û Amedî; wa tewrê rayşîyayîşî bibê. Ez vana şarê Licê wa wurzo ser payan û wayîrê Licê vejîyo. Ewro Licê bi destê fuhuş û tiryakî yeno qirêjkerdene. Ma nêwazenê Licê xirab bibo. Kurdîstan de serehawanayîşo tewr pîl Licê de virazîyabi. Ewro zî serehawanayîşo tewr pîl do reyna Licê de virazîyo. Licê seba ma girîng o, Licê warê şerî yo. Licê peyê îrade û estbîyayîşê xo de yo.”
‘Mil bidê milê ma’
Hemsereka DEM Partî ya Licê Nazîfe Maltaş zî ard ziwan ke ê do 14ê Kanûne de Licê de rayşîyayîşêko gird virazê û wina vat: “Ma şarê xo dawetê rayşîyayîşî kenê. Ma wazenê şarê ma tewrê nê rayşîyayîşî bibo û mil bido milê ma.”
‘Ma pêro şarê xo dawetê rayşîyayîşî kenê’
Îdarekarê MEBYA-DER’î Halîs Aksakal zî dîyar kerd ke ê do vera fuhuş û tiryakî rayra şêrê û vat: “14ê Kanûne de ma rayra şinê. Ma wazenê pêro şarê ma bêro û tewrê rayşîyayîşî bibo. Ma do vera fuhuş û tiryakî nerazîbîyayîşê xo bimojnê.”
‘No rayşîyayîş seba pêro şarê Licê yo’
Hemserekê DEM Partî ya Licê Berzan Peker zî vist vîr ke ê do roja 14ê Kanûne vera fuhuş û tiryakî rayra şêrê û dîyar kerd ke no rayşîyayîş seba pêro şarê Licê do bêro kerdene û va: “Coka ganî şarê Licê tewrê rayşîyayîşî bibo.”
