Temsîlkarê Taybet ê Sûrîye yê Amerîkayî Tom Barrackî do ewro şêro Îsraîl û Serewezîrê Îsraîlî Benjamîn Netenyahu reyde rewşa peyên a têkilîyanê Sûrîye û Îsraîlî munaqeşe bikero.
Goreyê xebera Jerusalem Postî Temsîlkarê Taybet ê Sûrîye yê Amerîkayî Tom Barrackî ewro do şîro Îsraîl û bi amancê viraştişê peymanêka ewleyî ya mabênê Îsraîl û hukmatê demkî yê Sûrîye de pêvînayîş bikerê. Yeno pawitene ke Barrack do Serekwezîrê Îsraîlî Netenyahu û rayedaranê bîn ê Îsraîlî reyde bêro têhet.
Goreyê agahîyanê Jerusalem Postî do pêvînayîşî de derheqê problemanê de ke mabênê Îsraîl û Sûrîye de est ê, bêro qiseykerdene. Demêk o ke mabênê Îsraîl û Sûrîye de seba viraştişê peymanêka ewleyî nîqaşî yenê kerdene la hewteyêk ra ver Wezîrê Karanê Teberî yê Îsraîlî Aron Saarî dîyar kerdbi ke pêvînayîşî xetimîyayê.
Berpirsîyaranê rayberîya DYA’yî dîyar kerdbi ke Trump çalakîyanê peyên ê Îsraîlî yê vera herra Sûrîye ra razî nîyo.
