Fermandara Pêroyî ya YPJ’yî Rohilat Efrîn derheqê hedîseyanê peyênan ê Sûrîye, prosesê entegrasyonê hêzanê leşkerî û muanqeşayanê destûrê neweyî ser o qisey kerd û vat: “Tu sîstemê yewrengî nêbenê çareserî. Seba Sûrîyeyêka demokratîk û bi îstîqrar, ganî estbîyayîşê cinîyan û heqê înan destûrê neweyî de bi şeklêko fermî bêrê garantîkerdene. YPJ tena hêzekê çekdar nîya, kulturê xopawitişî yê komelî ya.”
Mabênê HSD û Hukmatê Demkî yê Şamî de 29ê çeleyî de hîmê entegrasyonî ser o peymanêk ameybî îmzakerdene. Labelê hukmatê Şamî goreyê peymane tênêgêreno û nêwazeno YPJ sey hêzêko xoser bêro qebulkerdene. Hukmat bi manayê “miyanê artêşe de cinîyî çin ê” nêwazeno statuyê YPJ’yî bêro ca. YPJ nê nêzdîbîyayîşî red kena.
‘Ma xizmetê pawitişê komel û cinîyan de yê’
Fermandara Pêroyî ya YPJ’yî Rohilat Efrîn da zanayene ke peyê rijîyayîşê Rejîmê Esadî Sûrîye de muanqeşayê xorînî yenê kerdene û wina vat: “Eke nê prosesî de heme temsîlkarî, heme rengî, heme komel û cinîyî nêrê vînayene, îstîqraro tam nêbeno. Seserra 21î seserra munaqeşa û bedilîyayîşan a. Ma sey YPJ, Şorişê Rojava de seba pawitişê komel û cinîyan çi wezîfe kewt serê milê ma, ma ard ca û ma nika zî wayîrê nê berpirsîyarîyan ê.”
‘Seba ke sîstem bêro roniştiş ganî heme rengê Sûrîye bêrê vînayene’
Rohilat Efrîn bal ant têkoşînê YPJ’yî ser o û vat ke YPJ bîya modelêka pawitişî û wina domna: “Sey cinîyan û sey YPJ, Rojava de vera hêrişanê teber û zerrî modelêkê pawitişî virazîya. Destûrêko newe yeno munaqeşakerdene. Bi bedilîyayîş yan zî bi rijîyayîşê Rejîmê Baasî, helbet Sûrîye dexeylê bedilîyayîşî ke virazîyayî est ê. Nika destûrêko newe yeno munaqeşakerdene, eynî wextî de heme sazgeh û dezgehê ke Sûrîye de est ê, reyna yenê munaqeşakerdene. Seba ke ma zî Sûryeyij ê, sey kurd, sey cinî; tesîrê nê bedilîyayîşan û bedilnayîşan serê ma de zî reyêk de ma ser o beno. Ez bawer kena ke do nê muanqeşayî dewam bikerê. Çunke hema îstîqrar nêameyo ca. Sûrîye de seke yeno waştene hema sîstem tam nêameyo awankerdene. Seba ke no awan bibo, lazim o ke heme rengê ke Sûrîye de ciwîyenê bêrê vênayene û bi şeklêko azad ganî nê kesî tewrê Sûrîyeya newa bibê.”
‘Ganî Sûrîye de rolê cinîyan esas bêro girewtene’
Rohilat Efrîn munaqeşayanê destûrê bingehînî ser o zî wina vat: “Ganî destûr de heqê cinîyan bêrê vînayene. Eke heqê cinîyan bêrê garantîkerdene, komelê Sûrîye û Rojava de hîna rehet çareserî aver şêrê. Labelê eke cinîyî nêrê vînayene, no yeno manayî sîstemê yewrengî. Sîstemê yewrengî çareserîye nêano, eksê ci xetimneno.”
‘Ganî heqê cinîyandestûrî de bêrê garantîkerdene’
Rohilat Efrîn Peymana 29ê çeleyî ard vîr û da zanayene ke na peymane HSD’yî reyde ameya îmzekerdene û qiseykerdişê xo wina domna: “Tifaqê 29ê aşme, tîfaqêko pêroyî bi. Yanî na peymane tena seba kesêkî, beşêkî yan zî HSD de tena seba camêrdan nêamebî viraştene. HSD bi heme temsîlkaranê xo, bi heme beşananê xo mîyanê nê tifaqî de ca girewt, ma zî beşê nê tifaqî bîyî. Yanî wexto ke vat, yan zî tifaq virazîya, uca de nêame vatene ke cinîyî teberê nê tifaqî de yê. Nê semedî ra zî helbet ma na babete nika hukmatî reyde zî, wezaretê pawitişî reyde zî muanweşa kerde. Nika hetê Hukmatê Demkî ra yeno vatene ke ‘Seba ke mîyanê artêşe de cinîyî çin î, nêbeno ke cinîyî ca bigîrê’. Labelê ma zî naye vanî, yanî; tifaqêk virazîya, no tifaq tena seba cinsîyetêkî yan zî kesêkî nêame kerdene. Sey cinîyan zî, sey YPJ’yî zî helbet ez wazena bal bianca nanuqta ser o, yanî Rojava de, Sûrîye de ganî heqê cinîyan destûr e bêrê garantîkerdene. Ma do têkoşînê ney bidê. Eke no nêro kerdene, hêzê zî do nîmcet bimanê, do tam temam nêbê.”
‘YPJ tena hêzêka çekdarî nîya’
Rohilat Efrîn dewamê qiseykerdişê xo de wina vat: “Şorişê Rojava 15 serrî yo. Zîhnîyet û felsefeyê YPJ’yî heme dinya de vila bîyo. YPJ tena bi çek nîya; YPJ hem hêzêka rêxistinî ya hem zî hêzêka pawitişî ya. Ma nê felsefeyê cuye xo esas gênê. Cinî kamca de bê, ganî bêrê pawitene.”
‘Komel YPJyî sey parçeyêka komelbîyayîşî vîneno’
Rohilat Efrîn dîyar kerd ke munaqeşayê statuyê YPJ’yî ser o dewam kenê û wina domna: “Ma munaqeşa kenê ke YPJ herêma xo de bieşka biba tugayêka taybete. Hukmatê demkî wazeno YPJ mîyanê asayîşî de ca bigîra. Ma vera naye nêyî, labelê YPJ sey artêş komelê ma de ameya qebulkerdene. Komel hêzê YPJ’yî sey parçeyêka pawitişê komelkîbîyayîşî vîneno.”
‘YPJ mîrasêko ke heme cinîyan ci ra bawer kerdo’
Rohilat Efrîn peynîya qiseykerdişê xo de vat: “Qebulkerdişê statuyê YPJ’yî do biba sebebê aramî û îstîqrarî. Amancê ma yo tewr bingehîn pawitişê destkewteyanê cinîyan o. No mîrasê 15 serran o. Seba pawitişê ameyoxê Sûrîyeya newa, ganî nê çîyî heme bêrê qebulkerdiş.”
