Temsîlkarê sazî, rêxistin û partîyanê sîyasî yê Wanî mesajê Rayberê PKK’yî abdullah Ocalanî ser o erjnayîş kerdê. Temsîlkaran ard ziwan ke mesajê Rayberê PKK’yî Abdullah Ocalanî seba aşitî û azadîya şarê Kurd, Tirk û Rojhelatê Mîyanên derman o.
Parlementerê Partîya Têdûştê û Demokrasîyê ya Şaran (Dem Partî) Pervîn Buldan û Sirri Sureyya Onder sey heyetêk 28ê Kanûne de şîyê Girawa Îmrali û bi Rayberê PKK’yî Abdullah Ocalanî reyde pêvînayîşêk kerd. Heyet pêvînayîşî ra pey fikir û ewnîyayîşê Rayberê PKK’yî Abdullah Ocalanî bi beyanatêko nuştekî şarê reyde pare kerd. Rayberê PKK’yî Abdullah Ocalan mesajê xo de 7 nuqtayan ser o vindert û nîşan da ke o seba çareserîye game eştişê rê hedre yo. Parekerdişê mesajê Abdullah Ocalanî ra pey mesajê ser o nîqaş dewam kenê. Temsîlkarê sazî û rêxistinê Wanî yê demokratîkî derheqê mesajê de Ajansa Welatî rê qisey kerd.
‘Mesajê Abdullah Ocalanî reçeteyê aştî û azadîya Kurd û Tirkan o’
Rayberê KURDÎGEH’î Çetîn Ergîn dîyar kerd ke mesajê Rayberê PKK’yî Abdullah Ocalanî reçeteyê aştî, rizgarkerdişê şarê Kurd, Tirk û Rojhelatê Mîyanên o û wina vat: “Ganî no mesaj baş fehm bibo û bêro wendiş. Mesajêko Abdullah Ocalan dayo seba heme şaran aştîye mojneno. La Dewleta Tirk seba nê mesajî çend hedre ya û zelal a o dîyar nîyo. Ganî Dewleta Tirk zelal ba. Muxatabê şarê Kurd Abdullah Ocalan o. Ganî tecrîdo ke Abdullah Ocalanî ser o yo hewanîyo û firsend bêrê awankerdene ke Abdullah Ocalan rolê xo bîyaro ca. Ganî heme sazî û dezgeyî seba çareserîye bi têkoşînê xo paşti bidê Abdullah Ocalanî.”
‘Ganî heme sazîyê demokratîk û partîyê sîyasî rolê xo bîyarê ca’
Rayberê Rexistînê Dem Partî yê Wanî Yakûp Almaçî zî ard ziwan ard ziwan ke Rojhelato Mîyanên prosesêko newe ra vîyareno û wina dewam kerd: “Êdî hêvîya şarî seba ameyoxê nêmenda. Seba ke krîzêko pîl est o. Eke lîmanêko ke menfaatanê komelî paweno estbo, o zî Abdullah Ocalan û mesajê ey ê. Helbet mesajêko winasîn tena teorîk nîyo. Bingehêk û hêzêko pîl est o. Prosesêko ma nika tede yê xo mîyan de gelekî problem, xapînayîş û krîzê pîlî est ê. O semed ra her kes bi şik o. Seba ke nê problem û krîzî bêrê çareserkerdene ganî nêzdîbîyayîşêko samîmî û dirist bibo. Dewleta Tirk wazena Kurdanê Rojawanî reyde şer bika û Kurdanê parçeyanê bînan reyde aştî rona. La Kurd heme yew ê. Ganî Dewleta Tirk na babete zelal bikera.”
‘Ma zî sey sazî goreyê nê mesajî û aştîye ma destî ra çi bêro ma do bikerê’
Endamê Komela Hetkarî, Yewbîngirewtiş, Yewbîyayîş û Kulturî ya bi Keyeyê ke Merdimê xo Şariştanan de Vîndî kerdê (MEBYA-DER) Yûsif Dundar zî nîşan da ke eke Tirkîya nê prosesî de mabên xo û şarê Kurd de çareserîyêk nêyara ca û Abdullah Ocalanî muxatap nêgêra do krîzê Rojhelatê Mîyanên d e vîndî biba û wina vat: “Ma pêvînayîşê Îmrali û mesajêko Abdullah Ocalan pare kerdo muhîm vînenê. Ganî Dewleta Tirk xo ziwan xo yê jehrinî ra bixelesna û seba ke mabênê şarê Kurd û Tirkî de çareserîyêk bibo ganî bi hewayêko samîmî nêzdîyê nê mesajî biba. Ma zî sey sazî seba çareserîye ma destî ra çi bêro ma do bikerê. Seba nê prosesî de çareserî lazim a. Nê prosesî de ganî heme partîyê sîyasî yê Meclîsa Pîle ya Tirkîya (TBMM) û rêxistinê demokratîkî yê Tirkîya destê bierzê binê kerra û seba çareserîye destî înan ra çi yeno, bikerê.”
