Azerbaycanî, Ermenîstanî rê petrol erşawit. Sewqîyat mabenê şîrketanê taybetan ê ke nameyê înan nêameyo eşkerakerdene de ame kerdene. Azerbaycanî, tarîx de reyo verên serê Gurcistanî ra seba Ermenîstanî sewqîyatê petrolî kerd.
Ajansê APAyî yo ke Azerbaycan de hukmatî rê nêzîk o, da zanayene ke 22 vagonê ke tede benzinê AI-95î yê makula SOCAR’î estbî, Ermenîstanî rê ameyê erşawitene. Hukmatê Azerbaycanî ra derheqê babete de eşkerayîyêka fermîye nêameye dayene la Serekwezîrê Ermenîstanî Nikol Paşinyan û Wezîrê Ekonomîye Gevorg Papoyanî no sewqîyat tesdîq kerd.
‘Aştîye seba bazirganîye zemînê siyasîyî aferna’
Goreyê xebera OC Mediayî, îdareyê Êrîvanî zî no averşîyayîş tesdîq kerd.
Serekwezîr Paşinyan kombîyayîşê çapemenîye yê roja Pancşemeyî de va, “Bazirganî mabenê şîrketanê taybetan de bena. La aştîya ke mabenê Ermenîstan û Azerbaycanî de ameya ronayene, seba na bazirganîye şertê sîyasîyî afernayî.”
Paşinyan diyar kerd ke no proses daraxê sîyasîye de pabesteyê peymanan o.
Paşinyan tesdîq kerd ke gumrukanê Gurcistanî de problemî estê û hêvî kerd ke nê problemî do çareser bibê; eke nêbê, şîrketî do bîgerê rayîranê alternatîfan.
1.300 Ton benzin sînorê Ermenîstanî rê viyart
Wezîrê Ekonomîye Gevorg Papoyanî zî hesabê xo yê Facebookî ser o eşkerayîye daye û da zanayene ke 22 vagonê ke kapasîteya înan 1.300 ton o û tede benzînê A95’î esto, sînorê Ermenîstanî rê viyart. Papoyanî diyar kerd ke trên serê xeta rayhesinî ya Azerbaycan-Gurcistan-Ermenîstanî ra resaya Ermenîstan û va, “No, xoserîye ra nika beno ke karo tîcarî yo verên o.”
Papoyan va, “Ma cayê şerî de bazirganîye kenê. Şer beno sebebê vînîbîyayîşan, bazirganîye zî bena sebebê refahî.”
Sewqîyat pabesteyê Mutabaqatê Gabalaye yo
Goreyê çimeyanê medyayê Azerbaycanî no sewqîyat, çarçewaya mutabaqatê ke meyanê Hetkarê Serekwezîrê Azerbaycanî Şahîn Mustafayev û Hetkarê Serekwezîrê Ermenîstanî Maher Grigoryanî de 28ê Teşrîna Peyêne de Gabala de ame kerdene, ame caardene. Pêvînayîşê ke behsê ci beno, sey yew baska têkilîyanê meyanê komîsyonanê dîyarkerdîşê sînorî yê her di welatan ame kerdene û no bibi pêvînayîşê verên ê hetan.
8ê Tebaxe de Washington de peymananê ke mabenê Serekê DYA’yî Donald Trump, Serekkomarê Azerbaycanî Îlham Alîyev û Serekwezîrê Ermenîstanî Nîkol Paşinyanî de ameybî îmzakerdene ra dima, yew trêna ke tede 1.000 ton genim estbi Rusya ra serê Azerbaycan û Gurcistanî ra resabi Ermenîstan. No sewqîyat bi wedaritîşê astengîyanê rayîrê bazirganîye yê ke Azerbaycanî nêzdîyê 30 serran o Ermenîstanî rê tetbîq kerdêne, mumkin bi.
