Endama Înîsîyatîfê Yewîya Demokratîk û îmzakara konferansê “Seserra Dîyine de Ravurîyayîşê Komara Demokratîke” Dîba Keskîn dîyar kerd ke Rojhelatê Mîyanênî de sîstemî vûrîyenî, eke cayêk de vûrîyayîşêk bibo, no vûrîyayîş cîrananê xo ser o zî tesîr keno û wina vat: “Ev seserrî yo na komare de problemî est ê. No seserrî yo komare xo reyde dej û kulî ardî. Nika ra pey, seserra dîyine de ganî eynî dejî nêrê vînayene.”
13 û 14ê hezîrane de Stenbol de bi tewrbîyayîşê sîyasetmedar, roşnvîr, nuştox, akademîsyen û zaf kesan konferansê “Seserra Dîyine de Ravurîyayîşê Komara Demokratîke”” ame viraştene, vûrîyayîşê komare de maqaleyê muhîmî ameyê pêşkêşkerdene û qiseykerdişê muhîmî ameyê kerdene. Endama Înîsîyatîfê Yewîya Demokratîk û îmzakara konferansî Dîba Keskîn zî derheqê vûrîyayîşê komare de ajansê ma rê qisey kerd.
‘Vûrîyayîşê sîstemêkê winasîn rehet nîyo’
Dîba Keskîn dîyar kerd ke konferansî de munaqeşayê zaf muhîmî ameyî kerdene û wina domna: “Ez do biwaza ke munaqeşayê ke tîya de bîyê, sey kitabêk bêrê çapkerdene. No kitab zî do bibo dîyarîya tarîxî. Rasta zî ma rojanê tarîxîyan ra derbas benî. Vûrîyayîşê sîstemêkê winasînî wina bi rehetî nêbeno. Ewro 85 mîlyon merdim nêeşkenê nê welatî de weş bîciwîyî, xetimîyayîşêk est o. No xetimîyayîş, destûrê bingeyînî de heta ewro cayê xo nêgirewto. seypêyî hema nêameya awankerdene. Nê welatî de zaf neteweyî pîya ciwîyenî, nê welatî ra hes kenê. Naye zî mîyanê xo de kaos û xetimîyayîş ardo. Ewro zafaneyê nê welatî vûrîyayîş wazeno. Êdî hewce keno ke no vûrîyayîş bêro ca.”
‘Komare est a, labelê demokratîke nîya’
Dîba Keskîn qiseykerdişê xo de dîyar kerd ke no konferans bingeyê vûrîyayîşî ser o ameyo organîzekerdene û wina vat: “Nameyê konferansî zî vûrîyayîşê komara demokratîke yo. Komare verê cû zî est bibi, labelê demokratîke nîya. Munaqeşayî zî nê bingeyî ser o bîyî. Akademîsyen û sîyasetmedarî di rojan vûrîyayîşê komare ser o vindertî û fikrê xo pare kerdê. Nê fikrî serê di esasan de bîyî: Yew seserra yewine de cuyêka senî est bîbî û seserra diyîne de do cuyêka senî bîba û komare ser o senî tesîr bikera.”
‘Amancê ma vûrîyayîş o’
Dîba Keskîn tewr peyên bale ant muhîmîya vûrîyayîşî serê û qiseykerdişê xo wina qedêna: “Na komare yew bawerî û yew netewî ser o ameya heta ewro, labelê seserra dîyine de qet yew şar naye qebul nêkeno. Nêbeno ke na komare eynê dejan bida ciwîyayene. Verê ke komare bêra awankerdene pîvanê demokrasî dinya de hende zaf çin bîyê. Labelê ewro têduştî, ekolojî û aştî yenî qiseykerdiş. Ewro ekolojî cuya ma ya rojane ser o tesîr keno. Çira dej û kulê verênî dewam bikerî? Amancê ma vûrîyayîşê nê çîyan o. Ma bawer kenî ke ma do qencîye aver berê.”
