Endamê Heyetê Îmrali Mîthat Sancar badê pevînayîşî bi Wezîrê Edaletî Yilmaz Tunçî ra dîyar kerd ke “Aştîye bi hiqûq û Edaletî caye bena. Seba aye zî mesûlîyeteko pîl keweno sere mile Wezîrê Edaletî.”
Pêvînayîş çapemenî ra gîrewte ame vîraştîş. Pêvînayîş saeteke û nîme dewam kerd. Badê pêvînayîşî endamanê heyete verê berayê Wezaretê Edaletî de eşkerayî da çapemenî.
‘Aştîye tena bi hiqûq û edalet mende bena’
Pêvînayîş ra dima verî Mîthat Sancarî qîseykerd û va: “Ma Wezîrê Edaletî ra pêvînayîşêko hîra kerd. Ma hem xebatanê înan ser agahî girewte û hem zî pêşnîyarê xo vatî. Ma problemanê hiqûq û edaletî yê ke rojevdeyê înan ser ro vindertî. Serê prosesî û sererastkerdîşê hiqûqî ser de zî ma ewnîyayîşî xo pare kerd. Aştîye tena bi hiqûq û edaletî do caye biba.
Seba naye zî mesûlîyetoke pîl keweno serê mîlê Wezîrê Edaletî. Ey zî nê çîyî vatî; serê zafê madeyan de xebat yeno kerdiş. Ma waşt ke paketa 11. zî mîyan de ganî zemînê hiqûqî bêro xurtkerdiş. Ma zafêrî nê babetan de nîqaş kerd.
Bi nê hawayî seba viraştîş û vurnayîşê qanûnan zî babetê ma bî.
Ma zî birêz Wezîrê Edaletî ra pêhesîyayê ke xebatê înan zî est ê û pêşnîyarê xo kerdî.
Amancê ma o yo ke ma aştîye bi hiqûq mende bikerê. Seba serkewtişê nê prosesî bi xebateka pêro pîya lazima.”
Pêvînayîş de heqê tepîşteyan zî ame rojeve
Pervîn Buldane zî qiseykerdişê xo de diyar kerd ke rewşa hepîsxaneyan û binpêkerdişê heqanê tepişteyan zî pêvinayîşte ameyo rojeve û wina domna: “Rewşa tepiştayenê nêweşan û veşnayîşê înfazê tepişteyan zî babeta ma de bî. Xeylê tepişteyê nêweşî est ê û vera heyetê çimdarîye yê îdareyê hepisxaneyan nênê veradayîş. Na babete ser o zî ma fikr û pêşnîyarê xo kerdî. Ma do zî taqîp bikerê. Seba serkewtîşê prosesî na babete zaf muhîm a.”
