Parlamentera DEM Partî Newroz Uysal Aslane derheqê îstîsmarê cinsî yê ke Şirnex de bî, seba ke Wezaretê Edaletî cewab bido meclîs rê pêşnîyarperse daye. Pêşnîyarpersê Newroz Uysal Aslane seba çekuya Kurdîstanî ameya îadekerdene.
Newroz Uysal Aslane vera nê warî reaksiyon mojna. Pêşnîyarpersê Parlamentera DEM Partî ya Şirnexî Newroz Uysal Aslane ame îadekerdene. Newroz Uysal Aslane derheqê îstîsmarê cinsî yê vera domanan ke Şirnex de bîbî de, seba ke Wezîrê Edaletî Akin Gurlek cewab bido meclîs rê pêşnîyarperse dabî. Newroz Uysale vana ke seba ke pêşnîyarperse de çekuya Kurdîstanî ameya nuştene, pêşnîyarperse ameya îadekerdene.
Newroz Uysal Aslane vera îadekerdişê pêşnîyarperse reaksiyon mojna û wina vat: “Hişmendîya ke cayêko îstîsmarê cînsî yê vera domanan û polîtîkayanê bêcezaverdene cigêrayîş bikero, kedkaranê cemawerî danê mehkemekerdene, nika zî na bêhuqûqîye bi sansurî domnena û no zî nîno qebulkerdene. Dewaya ke kedkaranê cemawerî rê ameya akerdene, ne seba çinbîyayîşê datayanê îstîsmarî ya, la seba ke îstîsmar çarçewaya Kurdîstanî de ameyo vatene akerde ya. Xora datayê îstîsmarî destê dewlete de yê û dewlete faîl a. Vatena Serekê Egîtîm Senî yê Şirnexî Adnan Şenbayramî zî ke sey maneyê suci ameye mojnayene, na rasti eşkera kena. Pêşnîyarpersê ma zî seba na rastîye ameya îadekerdene. Cayêko vera îstîsmarî tehamul nêkerê, vera çekuya Kurdîstanî tehamul nêkenê. Sebeba îadeyî zî na ya.”
Newroz Uysal Aslane seba ke cewab bido, yewna pêşnîyarperse daye Serekê Meclîsî Numan Kurtulmuşî û pêşnîyarperse de pers kerd ke kamcîn vatene de, çekuyê “Vatena bêhuremet û nêweşe” esta. Reyna pêşnîyarperse de ameyo vatene ke, cayêko dewayê îstîsmarê vera gedeyan û bêcezaverdayîş berê cigêrayîş û mehkema kerdene. Kesê ke nê sucan anê ziwan zî serê babeta ke çekuya ke pêşnîyarpersî de bîyo sebebê îadekerdişî zî nêeşkeno heqîqet meydan ra wedaro.
