MEBYA-DER’a Amedî derheqê mîtîngê “Hêvî û Azadîye” ke do 4ê çeleyê 2026î de bêro kerdene, awanîya xo de eşkerayîyêk daye û vat: “Azadîya Serekî azadîya şaran a ke bi hewayêko pratîk cuye de ganî bêra ca.”
Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER) awanîya xo ya qezaya Peyasî ya Amedî de derheqê mîtîngê “Hêvî û Azadîye” yo ke do 4ê çeleyê 2026î de Qadê Îstasyonî de bêro kerdene, eşkerayî daye çapemenî. Endam û rayberanê MEBYA-DER’î, Dayîkê Aştî û rayberê xeylê sazgehan beşdarê eşkerayî bîyê. Verê ke eşkerayî dest pêbikera, seba kesanê ke têkoşînê azadîye de cuya xo vîndî kerda, rêze ameye girewtene. Dimayê rêzgirewtişî sloganê “Bijî Serok Apo” , “Şehîd namirin” û “Jin jîyan azadî” ameyê vatene.
Metnê eşkerayî yo bi kurmancî Rayberê MEBYA-DER’î Hayrettîn Gunerî û yê tirkî zî Hemsereka MEBYA-DER’î Gurbet Sevîktekî wend.
Metnê eşkerayî wina yo:
“Ma heme şehîdanê ke na herre ser o seba azadîye, rûmet û cuya hempare ya şaran, cuya xo vîndî kerda, bi rêzdarê anê xo vîr. Girêdayîya ma bi vîrardişê şehîdanê şorişî, qerarê ma yo awankerdişê komelê demokratîk û aştî dîyar keno. Ma ewro tîya de tena seba yadkerdişê dejanê ke vîyartê nêameyê têhet, eynê wextî de seba ke adalet, azadîye û hêvî bi hewayêko komelkî newe ra awan bikerê, ma tîya de yê. Her roja ke bi çinbîyayîşê kesanê ke ma vîndî kerdê, vîyarena, wijdanê komelî de birînanê xorîn verdano. Ma bawer kenê ke nê birînî tena bi rastîye, edalet û demokrasî eşkenê bêrê pîştene. Eynê wextî de ma ewro vengdayîşê Aştî û Komelê Demokratîk ê 27ê sibate ser o prosesê awankerdişê aştîya demokratîke de yê. Ma demêko tarîxî ra vîyarenê ke na aştî, demokrasî, hemwelatîya seypê û telîmatnameyanê qanûnî yê lazimî bêrê ca. Cayo ke heqê cuye nêyeno pawitene, behsê azadîye nêeşkeno bêro kerdene. Demokrasî tena şertê ke heq û azadîya bingeyîne yenê ewlekerdene, uca de manaya xo ya rastîne vîneno. Çareserîya demokratîk a problemê kurdî serranê dergî ra yo ke yena ereyvistene. La her kes zano ke no problem wayîrê muxtabêkî yo.
‘Azadîya Serekî azadîya şaran a’
Sîstemê tecrîdî yo ke huqûqî çin hesibneno, tena kesêkî ney, heme komelî ser o tesîr keno. Nê semedî ra waştişê Azadîya Serekî waştişêko takekesî nîyo, waştişêko tarîxî, sîyasal û komelkî yo. Rayîrê aştî û çareserîya demokratîke hewanayîşê sîstemê tecrîdî vîyareno. Bi na rastîyema seba azadîya Serekê xo mîtîngêk organîze kenê. No mîtîngêko rêze ra nîyo, destpêkê de azadîya Serekî reyde, bi taybetî azadîya şarê kurdî, awankerdişê çareserîya demokratîke, şer û teda ra xelesîyayîş o. Hêvîya ke mîtîngê ‘Hêvî û Azadîye’ de ya, azadîye bi xo ya. Azadîya Serekî azadîya şaran a ke do bi hewayêko pratîk bêra ca. No semedî ra beşdarîya xurte lazim a. No mîtîng îrade, hêz û qeweto komelkî ke do rayîrê serra 2026î akero, bimojno. Bi taybetî may, pî û wa û birayî ke şehîdê xo est ê; şarê kurdî û komelê demokratîkî, heme hetî ke aştî pawenê, ganî bi ruhê seferberîye beşdarbîyayîşî xurt bikerê û gird bikerê.”
