Sazgehê Ziwanê Kurdkî bi eşkerayîyêk vengdayîşê beşdarîya mîtîngê “Hêvî û Azadîye” ke do 4ê çele de bêro kerdene, kerd û vat: “Azadîya Rayber Ocalanî eynê wextî de azadîya ziwanê Kurdkî û erjanê kurdan a. Nê semedî ra ganî azadîya Rayber Ocalanî bêra ca.”
Platformê Sazgehanê Demokratîk do bi sloganê “Hêvî û Azadîye” 4ê çeleyê 2026î de Qadê Îstasyonî ya Amedî bi waştişê azadîya fîzîkî ya Rayberê Şarê Kurdî Abdullah Ocalanî, mitîngê “Hêvî û Azadîye” organîze bikerê. Mitîng do saete 13:00î de bêro kerdene. Do mîtîngî de azadîya Rayberê Şarê Kurdî Abdullah Ocalanî bêra waştene.
Sazgehanê Ziwanê Kurdkî derheqê mîtîngî de eşkerayî daye. Sazgehê ziwanî bi hewayêko hemwext Amed, Wan, Şirnex û Anqara de eşkerayîya çapemenî daye û vengdayîşê beşdarîya mîtîngî kerd.
Amed
Eşkerayîya Amedî awanîya Komela Cigêrayîşî ya Zanistanê Komelkî ya Kurdkî (MED-DER) de ameye dayene. Endam û rayberê sazgehanê ziwanê Kurdkî û gelekî kesî beşdarê eşkerayî bîyê. Metnê eşkerayî yê bi kurmancî Hemserekê KOZA-DER’î Murat Bîlgîçî, yê kirmanckî Hemsereka MED-DER’î Şukran Yakut wend.
Şirnex
Qezaya Cizîrî ya Şirnexî de zî hetê Komela Ziwan, Kultur û Hunerî ya Birca Belek û Cûdî-Der’î ra bi beşdarîya endam û rayberanê partîyanê sîyasî, sazgehê sîvîl û xeylê welatijan eşkerayî ameye dayene. Eşkerayî vernîya awanîya Komela Birca Belek de ameye dayene û pankartê, “Seba Rêzdar Ocalanî azadîye, seba ziwanê Kurdkî statu” ame akerdene.
Endamê Komela Birca Belekî Rojger Nûh Antî eşkerayî wend û vengda heme şarê Botanî ke seba azadîya Rayberê Şarê Kurdî Abdullah Ocalan û statuya ziwanê Kurdkî beşdarê mîtîngî bibo.
Metne eşkerayî wina yo:
“No demêk o ke pêşengîya Rayber Abdullah Ocalan û Têgêrayîşê Azadîya Şarê Kurdan de, pê cehdê heme dormeyê azadîwaz, demokratîk û haştîperweran prosesêkê awankerdişê komelê demokratîkî û haştîyêka bi hurmete rojeve de yo.
Bêşik, seba ke komelêko demokratîk bêro awankerdene û haştîyêka bi hurmete ya domdare bêro ronayene her çîyî ra ver ganî pergalêko demokratîk bêro ronayene. Rayîrê ney zî, verê her çîyî azadîya fîzîkî ya Rayber Abdullah Ocalanî û heme tepîşteyanê polîtîkan ra û qebulkerdişê heme heqanê ma yê kurdan ê globalan, komelkî û netewîyan ra vîyareno; ke seba naye zî ganî heme hewcedarîyê huqûqî û sîyasîyî bêrê caardene. Bi taybetî zî ganî statûyê ziwanê kurdkî û perwerdeyîya bi kurdkî bêro qebulkerdene û bêro tatbîqkerdene.
Rind yeno zanayene ke azadîya fîzîkî ya Rayber Abdullah Ocalanî û binpaykerdişê heqanê kurdan ê tewr xozayî, netewî û komelkîyan rasterast têkildarê yewbînan ê. Azadîya Rayber Ocalanî eynî wext azadîya ziwanê kurdkî û yê erjanê kurdan a. Coka ganî azadîya fîzîkî ya Rayber Ocalanî bêro caardene.
Bi nê amancî 4ê çeleyî de, Amedî de, “Mîtîngê Hêvî û Azadîye” yeno viraştene.
Ma veng danê heme partî, dezgeh û dormeyê kurdan, demokratîk û haştîwazan, bi taybetî zî veng danê heme dormeyan ke kurdan pawenê û venga şarê xo danê ke bi coşêko gird beşdarê mîtîngî bibê, seba komelêko azad û haştîyêka bihurmete vengê xo berz bikerê.
Biciwîyo Ziwanê Kurdkî
Biciwîyo Aştî
Biciwîyo Azadîye.”
