Yeno dîyarkerdene ke kilmvateyê zeqayê sunî (AI) yê Google’yî tayê cigêrayîşanê weşîye de bi dayîşê malumatê xeletî, rîskê xapînayîşê xebitnayoxan zêde kerdo.
Cigêrayîşo ke rojnameyê Guardianî yê ke merkezê ci Îngilîstan de yo viraşto, vet werte ke kilmvateyê zeqayê sunî yê bi sernameyê “AI Overviews” ke Google serê netîceyanê cigêrayîşî de dano, beno ke malumatê weşîye yê xelet û xapînoxî tede bibê.
Goreyê cigêrayîşî nê kilmvateyî, tayê rewşan de benê sebeb ke xebitnayoxî seba weşîye qeraranê rîskinan bigêrê.
Google vano ke nê kilmvateyê ke zeqayê sunî yê berhemkarî şuxilnenê “faydeyin” û “bawerkerde” yê, la nimûneyanê ke Guardianî cigêrayîşê xo de tesbît kerdê de derheqê nêweşîyanê kanser û kezebe de rayîrmojnayîşê xeletî ca girewtî.
Nimûneyêk de ke cigêrayîş de sey “zaf tehlukeyin” ame pênasekerdene, ame dîyene ke Google nêweşanê kanserê pankreasî ra wazeno ke werdanê bi rûnê zêdeyî ra dûrî vinderê. Pisporan dîyar kerd ke no tibben xelet o û şansê cuye yê nêweşan ser o tesîrê xirabî keno.
Rayberanê Pancreatic Cancer UK’yî hişyarî da ke dîyeto wina beno sebeb ke nêweşî kalorîyo ke bes o nêgêrê û nêeşkenê tehemulê tedawîye bikerê. Nimûneyêko bîn de zî ame vatene ke malumatê ke Google’yî derheqê testanê fonksîyonê kezebe de dayê kontekstî ra qerifîyayê û xapînox ê. British Liver Trustî dîyar kerd ke erjanê ke kilmvateyenê zeqayê sunî de sey “normal” ameyê nîşandayene raştîya tibbî reyde yewbînî nêtepişenê û no beno sebeb ke kesê ke nêweşîya kezebe ya giran ê înan est a rewşa xo sivik bigêrê.
Goreyê neqilkerdişê Guardianî, tayê cigêrayîşanê derheqê testanê kanserî yê cinîyan de zî malumatê “pêro xeletî” ameyê dayene. Pisporan bal ant ke netîceyê winayînî benê sebeb ke nîşanê raştkênî nêrê dîyene.
Google’yî zî îdîa kerd ke qismêkê nimûneyan goreyê “dîmenanê kêmîyan ê ekranî” yê, girêyî (lînkî) merdiman erşawenê çimeyanê bawerkerdeyan û o pêşnîyaz keno ke wa vînayîşê pisporan bêro girewtene. Dîrektora Forumê Malumatdayîşê Nêweşan Sophie Randall vato ke kilmvateyê zeqayê sunî malumatê weşîye yê xeletî benê serê netîceyanê cigêrayîşî û no rîskêko cîddîyî peyda keno.
Dîrektora Dîjîtale ya Marie Curieyî Stephanie Parker zî îfade kerd ke merdimî zafê rey demanê qerqilîyayîş û krîzî de muracatê înternetî kenê, nê deman de malumatê xeletî ya zî yê bêbalî (kontekst ra qerifîyayê) benê sebebê zeraranê cîddîyan.
