Rojnameger Zana Denîzî dîyar kerd ke grûbanê çekdar ê girêdayeyê hukmatê Şam û Tirkîya taxanê Şêxmeqsûd û Eşrefîye de qirkerdişê vera merdimîye kerdo û vat ke bi seyan welatijî ameyê remnayene û aqubetê înan zî dîyar nîyo.
Hêzê girêdayeyê hukmatê demkî yê Şamî û grûbê çekdar ê girêdayeyê Tirkîya bi çekanê giran hêrişê taxanê Şêxmeqsûd û Eşrefîye yê Helebî kerd. Grûbanê çekdar vera welatijanê sîvîl, cinî û gedeyan, camî û nêwşxaneyen bi hewayêko vera merdimîye bêmabên hêrişî kerdê û encamê hêrişan de xeylê welatijanê sîvîl cuya xo vîndî kerd û xeylê înan zî cuya xo vîndî kerd. Hêzanê ewleyî û welatijê taxan vera hêrişanê grûbanê çekdar tewrê îmkananê kêm taxanê xo de xoverdayîşêko tarîxî kerd. 6 rojan ra pey vizêr adirbest ame îlankerdene û kesê birîndar û cuya xo vîndî kerda vîyartê Vakur û Rojhelatê Sûrîye. Hezanê Sûrîya Demokratîke vengda welatijan ke taxanê xo de bimanê. Rojanmeger Zana Denîzî herême de hedîseyan nêzdî ra taqîb keno, derheqê hedîseyanê peyênan de ajansê ma rê qisey kerd.
Xoverdayîşêko tarîxî
Zana Denîzî îfade kerd ke vera tank û topan 6 rojan xoverdayîşêko bêemsal ameyo dayene û wwina vat: “Vera hêrişanê gird xoverdayîşêko zaf gird ame dayene. Her di taxî zî taxê şenik ê la bi hezaran hêz û çeteyî ameyê û bi tank û topan hêriş kerd. La rixmê ney zî xoverdayîşêko tarîxî ame nuştene. Zeyyad Efrîn seba ke nêkewo destê çeteyan çalakîyêka fedaî kerd. Seba ney zî ma eşkenê vajê ke Şêxmeqsûd û Eşrefîye de tarîx ame nuştene. Nêweşxaneyê Xalid El Fecir tena destê şarî de mendbi. Seb ake uca de bi seyan birîndar û nêwwşî est bîyê. Uca de xo pawitêne. La çeteyê girêdayeyê Tirkîya, Hamzat û Emşarî cehd kerdêne ke uca de qirkerdişêko gird bikerê. Nêweşxane de hêrişê girdî est bîyê. Derûdorî de zî dronê Tirkîya gêrayêne.”
Zana Denîzî dewamê qiseykerdişê xo de dîyar kerd ke welatijê Şêxmeqsûd û Eşrefîye yê ke koçber bîyê paweyê agêrayîşêko ewle yê û nê çîyî vatê: “Semo ke şar ame tîya ma zî înan reyde qisey kerd. Şar wazeno bi hewayêko ewle reyna agêrê taxanê xo. Hovîtîya çeteyanê girêdayeyê Tirkîya û hukmatê Şamî taxe de dewam kena. Bi seyan kesî ameyê remnayene û aqûbetê înan hema zî dîyar nîyo. Kes nêzano kamca d eyê. Nê semedî ra zî Şêxmeqsûd û Eşrefîte de sucê şerî ameyê kerdene. No suc bi destê Tirkîya û hukmatê Şamî ame kerdeneç No suc vernîya çimanê her kesî de ame kerdene.”
‘Seba ke şar agêro ewleyî lazim a’
Zana Denîzî bale ant kombîyayîşê ke Parîs de hetê Îsraîl, Tirkîya û hukmatê demkî yê Şamî ra amaebi kerdene û wian dewam kerd: “Qeraranê nê kombîyayîşan ser o nê hêrişê vera merdimîye ameyê kerdene. Rayberîya Xosere sere ra vana ke ganî şarê ma bi hewayêko ewle agêro ca û waranê xo. La uca nika ewle yo. Çeteyî kerdişanê vera merdimîye kenê. Rayberîya Xosere zî vana ganî ê taxî ewle bibê û çeteyî zî taxan ra vejîyê. La heta nika ê taxî seba ewleyî guncav nîyê û şar nêeşkeno agêro taxanê xo.”
‘Şar bêvengîye qebul nêkeno’
Zana Denîzî îfade kerd ke ganî vera hêrişanê vera merdimîye her ca de kurdî vengê xo berz bikerê û nê çîyî vatê: “Ganî şarî cayê xo de nêvinderê. Şarê Şêxmeqsûd û Eşrefîye ke ma înan reyde qisey kerd, vanê tehamulê ma vera bêvengîye çin o. Vanê na bêvengîye nêyena qebulkerdene. Hem dewletê mîyanneteweyî û hem zî sazgehê heqanê merdiman vera nê sucanê merdimîye bêveng ê. Êdî şar na bêvengîye qebul nêkeno. Şar vano ma do xover bidê. Şar nika zî Vakur û Rojhelatê Sûrîye de seba agêrayîşêko bi ewle xover dano.”
