Saetanê şewe de Amerîka xeylî cayanê başûrî Îranî bombarduman kerd. Îranî zî eşkera kerd ke vera hêrişanî Amerîka înan zî 18 merkezê leşkerî yê Amerîka yê herême hedef girewtê.
Amerîka reyna bi teyareyanê şerî û fuzeyan xeylî cayê başûrê Îranî bomberduman kerd. Fermandarîya Merkezî yê Amerîka (CENTOM) derheqê hêrişan de eşkerayîye dayê.
Eşkerayîye de ame dîyarkerdiş ke înan vera xeylî amancanê Îranî dest bi ‘hêrişanê neweyan yê pawitişê meşru’ kerd.
Medyaya Îranî zî eşkera kerd ke rojavayê Îranî şaristanê Fars û Hurmizganî de sîstemê pawitişê hawayî kewtê dewre, derûdorê Mînab, Bender Ebas, Kîş, Sîrîk, Qeşim û Hengamî de vengê teqnayîşanê bihêz ameyê eşnawitiş.
Trump: Îranî ma ra waştişê vindarnayîşê hêrişan kerd
Serekê Amerîka badê hêrişan eşkerayîyêke dê û dîyar kerd ke Amerîka bi 49 fuzeyanê Tomahawkî yê Cruîsî dayo Îranî ro. Sewbîna teyareyanê şerî zî başûrê rojavaya Îranî radarî, ê pawitişê hawayî, bombarduman kerdê.
Trumpî, tehdîtê dewamkerdişê hêrişan kerd û vat: “Heke Îran peymana ke ma waşta îmza nêkero, ma do siba reyna bi hawayêko şîdetin Îranî bombarduman bikerê.”
Trumpî îdia kerd ke wezîfedarê Îranî, ey reyde kewtê tekîlî û ey ra waşt ke hêrişî bêrê vindarnayîş.
Îranî mîsîlleme kerd
Saetanê erêy ê şewa verêne de verê ke hêrişî dest pêbikerê, Îranî eşkera kerd ke înan Neqebê Hurmuzî bi temamî girewt û keştîyê ke hewl daye neqebî ra vêrê, ameyê hedef girewtene. Supayî Pasdaran yê Îranî zî eşkera kerd ke sey cewabê hêrişanê Amerîka, înan bi 12 fuzeyanê balîstîkî hêrişê kampê hewayî yê Ezreqî yê Urdunî kerd.
Eşkerayîye de ame dîyarkerdiş ke kampê teyareyanê şerî ê Amerîka yê tewirê F-35, F-15, F-16 û merkezê kontrol û fermandarîyê Amerîka tedeyê, înan îmha kerdê.
Supayî Pasdaran dîyar kerd ke înan 18 cayê ke Amerîka tede ya hedef girewtê û vat ke heta hêrişê Amerîka nêvinderê, do hêriş înan zî dewam bikerê
