Hemserekê CDK-F’yî Şahîn Polatî venga pêro Kurdîstanijan da ke seba pawitişê Rojawanî, xurtkerdişê destê Rayberê PKK’yî Abdullah Ocalanî û hesabpersayîşê qirkerdişê 11ê çeleyî de tewrê çalakîya Parîsî bibê.
Seba yadkerdişê qurbananê Qirkerdişê Parîsî yê 9ê Çeleyê 2013î û 23yê Kanûna 2022yî 11ê çeleyî de Parîs de, Gare Du Nord de do rayîrşîyayîş û mîtîngêk bêrê kerdene. Hemserekê Komelê Demokratîkî yê Kurdan ê Fransa (CDK-F) Şahîn Polatî venga her kesî da ke tewrê çalakîyan bibê.
Polatî vat: “Ma serrgêra Qirkerdişê Parîsî yê Yewinî de yê. 9ê Çeleyê 2013î de Sakîne Cansiz, Fîdane Dogan û Leyla Şaylemez Parîs de ameybî qetilkerdene. Rayberê PKK’yî Abdullah Ocalanî no qirkerdiş sey ‘Terteleyê Dêrsimî yê Diyînî’ pênase kerdbi. Şexsê Sakîne Cansiz de qirkerdiş vera paradîgmaya demokratîke, ekolojîke û azadîya cinîyan ameye kerdene. Heta ke edalet bêro caardene, heta ke nê qirkerdişî bêrê roşnîkerdene ma do têkoşîn bikerê.
Bi na wesîle ma do 11ê çeleyî de saete 10.00 de Gare Du Nord de kom bibê. Ma venga pêro dostanê xo, embazanê xo danê ke nê wextê tarîxî de seba pawitişê Rojawanî, seba pawitişê xeta azadîya cinîyan, seba ke kiştoxan ra hesab bipersê, seba çareserîya meseleyê Kurdan û statuyê Kurdîstanî tewrê nê rayraşîyayîşî bibê.”
