Dayîka Sakîne Cansiz, Zeynep Cansiz warê xo Dêrsim de ameye oxirkerdene.
Dayîka qadroyanê pêşeng ê PKK’yî ra Sakîne Cansiz, Zeynep Cansiz şaristanê xo Dêrsim de ameye definkerdene. Cenazaya Zeynep Cansiz wesîyetê aye ser o goristanê şaristanî ke mezela Sakîne Cansiz uca de yo, ameye definkerdene. Merasîmê definkerdişî ra ver cenaza berde keyeyê aye û ci ra riza ameye waştene.
‘Oxir bo dayîka delale’
Tewr peynî seba Zeynep Cansiz Cemxane de merasîm ame viraştene. Waya Zeynep Cansiz, Guneş Cansiz merasim de qisey kerd û wina vat: “Hemraye Sakîne û yê waya mi ke tîya de yê, şima bixeyr ameyê. Waya mi estuna keyeyê ma bîye. Ez nêvana estuna keyeyê ma kewta, semedo ke dara çinara ma nêkewta, aye hema zî lingan ser o ya. Aye seba domananê xo tim lingan ser o bîyê. Maya mi cinîyêka erjîyaye bîye. Waya mi xeylê îşkence dî. La aye şîya kişta Sakîne. Oxir bo dayîka delale.”
‘Mesajê azadî û xoverdayîşî ya’
Dima ra Hemsereka Pêroyî ya DBP’yî Çîgdem Kiliçgun Uçar qisey kerd û aye zî nê çîyî îfade kerd: “Ma hewl danê ke aver şorê. Ma û sakîne Cansiz domanê Zeynep Cansiz ê. Heta ke ma bicwîyê û wextê ma bibo, ma ne fek azadîye ra û ne zî xoverdayîş ra veranêdanê. Çiqas zulim ma bikerê zî, çiqas hêrişê ma bikerê zî ma apey game nêerzenê. Amancê ma xoverdayîş û azadî ya. Embaza Sakîne Cansiz ma rê pêşengî kerd. Aye têkoşînê azadîya kurdan de pêşengî kerd û pêşengîya ciwanan kerd. Azadî do her tim serê ziwanê ma de bo û xoverdayîş zî do her tim fikrê ma de bo. Ma tîya de yê, ma nêşinê, la na gule do her tim her ca de aba û qet nêçelmisîyê.”
‘Ma do wayîrê raya xo vejîyê’
Aktîvîsta TJA’yî Gulten Kişanak zî vat werekna ewro Sakîne tîya de bîyêne û wina qiseykerdişê xo domna: “Werekna embaza Sakîne ewro tîya ma reyde bibîyêne. Seba ke ma heme ewro tîya yê, seyembaz û hogirê aye, ma berpirsîyara xo genê xo ser. Ma do dayîka Zeynep oxir bikerê, raywanîya aye peyêne, seke hemraya ma Sakîne zî ma reyde bo. Wa aye mîyanê aramî de ba, mîyanê roşnayî de bi aramî rakewa. Cuyêka çetine û birûmete ciwîyaye. Qirkerdişê Dêrsim ra bigîre heta zindanê Amedî û tîya ra bigîre heta qirkerdişê Parîsî aye nê dejê girdî û birûmetî girewtî. Seba ma aye her tim sembolê rûmetî, xoverdayîş û azad a. Ma xeylê dêndarê Sakîne, dayîka Zeynep û heme kesanê ke ma vîndî kerdê.
Ma înan bi hurmet yad kenê û ma do wayîrê erjê înan vejîyê. Ma do wayîrê herra xo, ziwanê xo û raya xo vejîyê, oxir bo Dayîka Zeynep.”
Badê qiseykerdişan seba definkerdişî, cenazaya Zeynep Cansiz arde dewa Tatxal a Korkezê û îta de ameye oxirkerdene.
