Endamê Komîteyê Amedekar ê Mitîngê “Hêvî û Azadîye” ke do 25ê çele de bêro viraştene, Rûçem Vefa Elyakût û Remzî Azîzoglûyî wina vat: “Heta ke birêz Abdullah Ocalan azad nêbo prosesê ‘Aştî û komelê Demokratîk’ zî nêreseno amancê xo.”
Platformê Sazgehanê Demokratîk, seba azadîya fizîkî ya Rayberê Şarê Kurdî Abdullah Ocalanî 25 çele de Meydanê Îstasyonî yê Amedî mîtîngê “Hevî û Azadîye” mîtîng organîze bikero. Endamê Komîteyê Amedakar ê mîtîngî Hemsereka Partîya Herêmanê Demokratîk (DBP) ya Amedî Rûçem Vefa Elyakût û Hemserekê Komela Cigêrayîş û Kulturê Mezopotamya (MED-DER) Mehmet Remzî Azîzoglu ajansê ma rê qisey kerd.
‘Do mîtîng seba heqê hêvî bêro viraştene’
Rûçem Wefa Elyakût ard vîr ke înan deklerasyonê mîtîngî 17ê teşrîna verenê de eşkera kerdbi û dest bi xebatanê mîtîngî kerdo û wina vat: “Seba şertanê zimistanî û rewşa hewayî ma mîtîng taloq kerdbî. Ma do mîtîngê xo 25ê çele de virazê. Xora amedekarîya mîtîngî dest pêkerdbî. Ma keye bi keye gêrabî û xebata xo kerdbî. Heta ke birêz Ocalan azad nêbo, prosesê ‘Aştî û Komelê Demokratîk’ zî nêreseno amancê xo. No mîtîng do seba heqê hêvî bêro viraştene. Rayberê Şarê Kurdî Abdullah Ocalan vano ‘Azadîya mi girêdayeyê azadîya komelî ya’ komel zî vano heta ke Rayberê ma azad nêbo ma zî azad nêbenê.”
‘Heta Rayberê Şarî Kurdî azad nêbo ma zî azad nêbenê’
Rûçem Vefa Elyakût şar dawetê mîtîngê “Hevî û Azadîye” kerd û wina vat: “No proses tena seba şarê kurdî nê seba heme şaran o. Ganî şarê kurdî 25ê çele de Meydanê Îstasyonî de seba azadîya birêz Abdullah Ocalanî û şarê kurdî tîya de bo û vengê xo berz bikero. Do şar meydan de vajo ‘Heta Rayberê Şarî Kurdî Abdullah Ocalan azad nêbo ma zî azad nêbenê.”
‘No mîtîng seba yewîya şarê kurdî muhîm o’
Remzî Azîzoglûyî derheqê mîtîngo ke seba heqê hêvî do bêro viraştene wina vat: “Mîtîng de do azadîya fizîkî ya birêz Abdullah Ocalanî bêro waştene. Birêz Abdullah Ocalan hetêkê yê prosesî yo. Seba ke proses dewam bikero û her di hetî zî ganî eynî rewşe de bibê. Ganî ‘Heqê Hêvî’ bêro ca û birêz Abdullah Ocalan azad bibo. Ganî şarê kurdî tewrê mîtîngî bibo. Ewro Rojhelato Mîyanên newe ra yeno dîzaynkerdene. Ma zî vanê Rojhelato Mîyanên bê şarê kurdî nêyeno dîzaynkerdene.”
