Qezaya Çewlîgî Kanîreş de, vera talankerdişê xoza û dorpêçê sermaye bi beşdarîya hezaran kesan “Mîtîngê Dewa û Cuye” ame viraştene. Mîtîng de sloganê “Sermaye bicehnime, Kanîreş ê ma yo!” ame vatene û ame vatene ke şar do destûr nêdo talankerdişê qadnê xo yê cuye.
Mîtîng bi ruhê pawitişê awe, erd û rûmetî dest pêkerd. Qiseykerdoxan bale ant yewîye ser o û vatî: “Ma na qade de tena nîyê. Silam seba ê kesan ke nê pirdê xoverdayîşî viraşto û vanê ‘dewaya welatî dewaya ma ya.’ Parlamenterê Çewligî yê DEM Partî Omer Faruk Hulaku, Parlamentera Dêrsimî ya Parlamentera Mûşî ya DEM Partî Sumeyye Boz, Parlamentera Stenbolî ya DEM Partî Kezban Konukçu û temsîlkarê dezgehanê huqûqî, komelê ekolojî û komelê Elewîyan beşdarê mîtîngî bîyî.
‘Ma rayîr nêdanê talanî’
Rayîrşîyayîş bi coşe resa girseyo ke meydan de bi. Parlamentera Dêrrsimî ya DEM Partî Ayten Kordu ewil qisey kerd û vat: “Şarê ma seba pawitişê ameyoxê xo, erd û awa xo meydanan de yo û mojneno ke do rayîr nêdo talanî. Ma do nêverdê no talan bibo. Heqîqetê ma, heqîqetê xoverdayîşî yo. Şarê ma rayîr nêdayo no zîhnîyeto talanker ê sermaye û nêdano zî. Ma do nê têkoşînî pîya rayra berê. Ma do vera kiştoxanê domanan, cinîyan û xoza vengê xo berz bikî. Têkoşînê şima, têkoşînê ma yo. Vizêr Gimgim, ewro Kanîreş û meşte ma do seba Dêrsimî meydanan de bî.”
‘Ma do serkewê’
Parlamentera Stenbolî ya DEM Partî Kezban Konukçu zî wina vat: “Ma tîya ra silamêk xoverdayoxanê Deryaya Sîya û Ege rê bierşawê. Sermayeyêka Amerîkayî wazena erdê ma çin bika. Êyê ke cografyaya şarî pêşkêşê emperyalîstan kenê, wa bizanê ke ê do înan reyde şêrê. Ma do pîya serkewî. Ma do teqez serkewî.”
‘Ma do înan Kurdîstan ra vejê’
Parlamentera Mûşî ya DEM Partî Sumeyye Boz zî îfade kerd ke ziwanê sermaye dişmenê xoza yo û va: “Emperyalîstî dişmenê xoza û merdiman ê. Ma do Kurdîstan de rayîr nêdê talanî. Êyê ke nê erdî ser o nîyê, tena seba pereyan yenê û wazenê erdê ma xirab bikerê. Ma do înan Kurdîstan ra vejê.”
Parlamenterê Çewlîgî yê DEM Partî Omer Faruk Hulaku zî diyar kerd ke ê do rayîr nêdê talanî: “Vizêr şarê Gimgimî, ewro şarê Kanîreşî meydanan de xover dano. Wexto ke ê ewnîyênê erdê ma ra, pere û rantî vînenê; la ma cuye vînenî. Bobelatê Îlîçî vîrê ma de yo. Ez bi xo şahîdê bêhuqûqîya ucayî bîya. Rayedarê fîrmaya Amerîkayî nêameyî muhakemekerdene. Nika wazenê ê çîyî tîya de bikerê. Ma do bi yewîye serkewî.”
Bi şîîra Ahmed Arifî xoverdayîş ame silamkerdene
Mîtîng de şîîra Ahmed Arifî “Eşqê to ez canêverdaya” ameye wendene. Dima Koma Birîndar sehne girewt û bi deyîran govende ameyî girewtene. Mîtîng bi sloganê “Bijî Têkoşîn!” û “Biciwîyo serewedaritiş!” qedîya.
