Rayberê Şarê Kurdî Abdullah Ocalan, kombîyayîşê Însîyatîfê Yewîya Demokratîke rê mesajêk şirawit û wina va: “Parçebîyayîşê Kurdistanalî raştîyêka tarîxî îfade keno. Çareserîya problema kurdan û yewîya demokratîke, eke aştî û azadîya heme şaranê Tirkiya, Îran, Iraq û Sûriyeyî bigîro mîyanê xo, do hîna bimaneyêr biba.”
Însîyatîfê Yewîya Demokratîke bi slogana “Em ê bi ruhê yekîtiyê bi ser bikevin” (Ma do bi ruhê yewîye ser bikewê) Kombîyayîşê xo yê Pêroyî yê Asayî yê 2ine, Eywana Konferansî ya Alî Emîrî ya Şaredarîya Bajarê Girdî ya Amedî de viraşt. Kombîyayîş de mesajê Rayberê Şarê Kurdî Abdullah Ocalanî ame wendene.
Mesajê Abdullah Ocalanî wina yo:
“Kongreya Însîyatîfê Yewîya Demokratîke rê…
Yewîya neteweyî ya demokratîke; ferasetê yewîye yo winasî yo ke îradeyê azad ê şar û komelan ser o ronîyayo, serbest û zafreng o. Na yewîye, qalibanê dewleta neteweyî ya yewpereste û merkezîye nê, rêxistinbîyayîşêko komelî îfade kena ke hêzê xo ca ra gêna û beşdarîya demokratîke esas gêna. Hêzê xo îqtîdarbîyayîşî ra nê, komelbîyayîşî ra gêna.
Parçebîyayîşê Kurdistanî yê çar parçeyan, raştîyêka tarîxî ya. Şertê xoserî yê her parçeyî ganî verê çiman de bêrê girewtane û bi metodanê cîyayan yewîye eşkena bêro averberdene. Yewîya mabênê parçeyan, nê ke bi armancê ferasetê îqtîdarê dewletperestî, ganî bingehê ferasetê neteweya demokratîke ser o bêro ronayene.
Çareserîya problema kurdan û yewîya demokratîke, wexto ke pîya bi cigêrayîşê azadî û aştîye yê heme şaranê Tirkiya, Îran, Iraq û Sûriye bêrê destgirewtene, mane qezenc kenê.
Yewîya mayînde bi zorî ney; bi seybîyayîş, yewbînanşinasnayîş û îradeyê pîyacuyayîşî mumkun a. Coka ez lazim vînena ke xusûsen karakterê demokratîk ê yewbîyayîşî ser o qetî bîvînda. Wexto ke nê xebatî yenê kerdene, bêşik siyasetê demokratîk û rêxistinbîyayîşê komelê demokratîkî rayîrê bingehîn ê nê rayraşîyayîşî yê.
Ez bawer kena ke na kongre do biba gamêka muhîme ke prensîp û armancanê yewîya demokratîke xurt keno.
Ez şima pêroyan bi hezkerdişê xo yê bêpeynî selam kena.
Abdullah Ocalan
Girawa Îmralîyî”
