Torna Seyîd Rizayî, Zelîha Polate ewro serê sibayî Nêweşxneyê Unîversîteya Firatî ya ke tede amêne dermankerdene de şîye heqîya xo. Cenazeya Zelîha Polate, meşte Keyeyê Cemî yê Yildiz Baglarî de dima erkanê cenazeyî do bêra definkerdene.
Ajansê Mezopotamya rê qisey kerdbî
Zelîha Polate raya pêyêne 15ê teşrîna peyêne de serrgêra Seyîd Riza û embazanê ey de nêweşxaneyo ke tede tedawî bîyêne, bi telefon Ajansê Mezopatamya rê qisey kerdbî. Qalê xo de Zelîha Polate vatbî ke: “Ez nê 88 serrî yo ke wazena cayê mezelê kalikê xo û embazanê ey bêro eşkerakerdene la heta nika yew gamê nêame eştene. Rewşa mi dîyar a, seba ke emserre ez nêweşxane de ya, no ser ez nêeşkîyeya tewrê merasîmê vîrardişî biba. Coka sey her serre uca de mi waştêne cayê mezelan eşkera bibo. Wazenê serê qirkerdişan bigirê, hêvîya mi êdî înan ra nêmenda. Aştî nika yena qiseykerdene, no çiyêko zaf rind o; la samîmî nîyê. Ma dej û xemginî ciwiyayê. Tiya ra tepîya ez hêvî kena ke nê çîyî nêrê ciwîyayîş, la ez bêhêvîya.”
‘Çimê mi do akerde bimanê’
Zelîha Polate qiseyê xo ra wina dewam kerdbî: “Bi dîyayişê cayê mezelî yê Seyid Riza û embazanê ey nêwazenê ke demê qirkerdişî, çîyî ke ame ciwîyayîş, bêrê vîrardêne. Şima cayê mezelanê ma, ma rê nêvanê û nêwazenê nê problemî çareser bibê. Ma rê problemanê neweyan vejenê. Goreyê qanûnanê xo, dewa ma çin kerdî û nameyê dewa ma Axdatî zî resmîyet de estaritî. Nêmeyê cayê mezelanê ma zî dewrê xezîneyî kerdî. Ez bimira do çimê mi akerde bimanê.”
