Platforma Sazgehanê Demokratîk, Înîsîyatîfê Yewîya Demokratîk, Platformê Yewîya Cinîyanê Kurd û Partîyê Kurdîstanî derheqê hêrişanê ke Vakur û Rojhelatê Sûrîye hedef gênê, Amed de eşkerayî dayî û dîyar kerd ke piştîdayîşê dewleta tirkan yê çeteyanê HTŞ’yî nêyena qebulkerdene û seba destkewteyanê Rojava wa her kes bi ruhê Kobanî wirzo lingan ser.
Hemserekê Pêroyî yê DBP’yî Keskîn Bayindirî dîyar kerd ke 6ê kanûnî ra heta nika hêrişêko wehşîyane vera şarê kurdî yeno ramitene û wina vat: “Ê ke Rojhelatê Mîyanênî de aştî wazenê, hemverê nê hêrişan de nerazîbîyayîşê xo eşkera kenê. Bi pêşengîya HTŞ’yî ferasetê DAÎŞ’î cinî û ciwan ê kurd ser o hêrişêko vera însanîyetî yeno kerdene. Piştîdayîşê Tirkîya seba nê hêrişanê wehşîyanan est o. Dişmentîya kurdan heta nika Tirkîya rê netîceyêka raşt nêarda. Vengdayîşê ma dewleta tirkan rê est o ke bilez piştîdayîşê xo yê HTŞ û zîhnîyetê DAÎŞ’î vindarna.”
‘Ma do destkewteyanê şarê xo bipawê’
Bayindirî wina dewam kerd: “Ma ewro îlan kenê ke ma aştîyêka birûmet û erdê xo ser o statuyê xo wazenê. Ma bindestî qebul nêkenê. Nê hêrişê ke Rojavayê Kurdîstanî ser o yenê kerdene, 60 mîlyon kurdî dinya de kerdî yew zerrî. Ma na hêvîye ser o destkewtişanê şarê xo heta ke îmkanê ma est ê, ma do bipawê. Zor û zehmetîyî şarê ma ser o bibê zî ma do bi ruhê yewîye û azadîye xover bidê û her ca de bibê yew.”
‘Ganî her kes bi ruhê Kobanî wirzo lingan ser’
Dayîka Aştî Delal Aktaşî dîyar kerd ke wa her kes bi ruhê Kobanî wirzo lingan ser û wina vat: “Nê çalakîyê ma bes nîyê. Ganî ma bi ruhê Kobanê vînderê. Ganî ma şêrê sînoran. Ê wazenê Rojava bigîrê û kurdî sernêkewê. Nika prosesê aştî est o. Ê wina kenê ke proses xirab bibo û reyna şer dest pêbikero. Ganî her kes xo ser o vindero, ma nêeşkenê keyeyanê xo de ronişê.”
‘Rojava Kurdîstan a, 60 mîlyon kurdan temsîl kena’
Hemverfekê Înîsîyatîfê Yewîya Demokratîke Mehmed Kamaçî dîyar kerd ke ê rojanê tarîxîyan ra vîyarenê û wina dewam kerd: “Rojava tena Rojava nîya, çar parçeyê Kurdîstanî ya û 60 mîlyon kurdan temsîl kena. Bi bedelanê girdan destkewtişî ameyê girewtene. Zerrîya 60 mîlyon kurdan Rojava de danapiro û Rojava seba înan xeta sûr a. Cewabo tewr gird oyo ke ma yewîya şarê kurdî awan bikerê. Heta ke şarê kurdî yewîya xo awan nêkero nê hêrişî do dewam bikerê.”
‘Wazenê Şorişê Cinîyan bifetisînê’
Endama Platformê Yewîya Cinîyanê Kurd Fatoş Stêrk dîyar kerd ke bi polîtîkayanê qirkerdişî ke Rojavanî ser o yeno ramitene wazenê Şorişê Cinîyan bifetisînê û wina domna: “Xirabkerdişê heykelan ê Tebqayî de ma reyna feraseto lêmin di. Seba Rojhelatê Mîyanên û Kurdîstanî çareyo tewr gird yewîya kurdan a. Gama ke ma bîyê yew qet yew hêz nêeşkeno vernîya azadîya ma de vindero.”
‘Ganî partîyê sîyasî yê kurdan bibê îtîfaq’
Serekê PDK-T’yî Mehmed Emîn Kardaşî bale ante hêrişanê ke verê cû vera şarê kurdan ameyê kerdene ser o û wina vat: “Ganî şarê kurdî baş bizano ke dişmenê înan kam o dostê înan kam o. Ganî partîyê sîyasî yê kurdan bibê îtîfaq, pîya qerarêk bigîrê.”
‘Xelasîya tirk û kurdan yewbînan reyde girêdaye ya’
Rayberê Partîya Azadî Cemal Satî dîyar kerd ke xelasîya tirk û kurdan yewbînan reyde girêdaye ya û wina vat: “Eke şarê kurdî Rojava de statuyêk destfîno, ameyoxî de do Tirkîya reyde îtîfaqêko baş bikero. Ez xoverdayîşê Rojava silam kena.”
