Fermandarê HPG’yî Murat Karayîlanî îfade kerd ke hêrişê ke vera Rojava yenê kerdene komployêko mîyanneteweyî yo ke heme Kurdîstanî hedef gêno û venga şarê kurdî da ke wa bibo seferber û piştî bido Rojava.
Fermandarê HPG’yî Murat Karayîlanî ke ajansê ANF’yî rê derheqê rojeve de ejrnayîşî kerdî vat ke şero ke Rojavayê Kurdîstanî de Heleb ra heta Hesekê dewam keno, tena Rojava ney heme Kurdîstanî hedef gêno.
Karayîlanî şexsê Zîyad Heleb û Denîz Çîya de heme şehîdî yad kerdî, xoverdayîşê şarê Rojava silam kerd û vat: “Nê hêrişî komployêko plankerde yo ke yeno waştene ke şarê kurdî îrade û statuyêk nêgîro.”
Karayîlanî dîyar kerd ke no mîyanê nê komployî de hêzê mîyanneteweyî û herêmî est ê û dewleta tirkan bi teyareyanê şerî, çalakîyanê îstîxbaratî û grûbanê çeteyan rolêko aktîf kay kena û vat: “Wexto ke Vakur de behsê aştî û wayûbiratîye beno, hedefgirewtişê destkewteyanê kurdan ê Rojava nakokîyêka eşkera ya. No hêrişêko pêroyî yo ke vera şarê kurdî yeno kerdene.”
Karayîlanî hêzê mîyanneteweyî zî bi hewayêko huşk rexne kerdê û ard vîrî ke Rojava vera DAIŞ’î rûmetê merdimîye pawit. Karayîlanî tenaverdayîşê Rojava yê Amerîka û welatanê koalîsyonî sey “rîyakarî” bi name kerd û vat ke no tewir muamele wijdanê şarê kurdî û raya pêroyî ya dinya de nişanêk verdano ke nêyeno estaritene.
Karayîlanî dîyar kerd ke prosesê Rojava hetê Îdareyê Xoser ê Demokratîke ra bi îlanê seferberîye cewab dîyo û bale ante ke na seferberîye seba çar parçeyanê Kurdîstan û heme kurdanê teberê welatî zî vîyartbar a. Karayîlanî venga ciwan, cinî û şarê kurdî da ke wa wayîrê Rojava vejîyê û bi çalakîyan yewîya xo ya neteweyîye bimojnê.
Tewr peynî de Karayîlanî îfade kerd ke o bawer keno YPG-YPJ û hêzê HSD’yî sey Kobanê ewro zî xoverdayîşêko tarîxî kenê. Karayîlanî ke şarê Rojava rê mesajê “şima tena nîyê” da, vat ke bedêlê ci çi beno wa bibo sey şarê kurdî û sey Têgêrayîşî Azadîye Rojava qet tena nêverdanê.
