Dimayê rayîrşîyayîşê Nisêbînî polîsan hêrişê girseyî kerd û 6 rojnameger zî tede xeylê kesî destbend kerdê.
Seba piştgirîya Rojavayê Kurdîstanî qezaya Nisêbîn a Mardînî de bi beşdarîya hezaran kesan rayîrşîyayîş ame kerdene. Welatijan waşt sînorî vîyarê. Nê mabênî de polîsan hêrişê girseyî kerd û xeylê kesî destbend kerdê.
Heto bîn ra hêrişê polîsan de Hemsereka Komela Rojnamegeran a Dîcle Firatî (DFG) Kesîra Onel, muxabira Ajansê Mezopotamya (MA) Heval Onkol, rojnameger Ferhat Akinci, Pelşîn Çetînkata, Muhammet Alî Yilmaz û Bariş Demîrcan zî ameyê destbendkerdene. Polîsan demo ke dest bi destbendkerdişan kerd rojnamegerî derb kerdê û ê dekerdê wesayîtanê xo.
Nika pêroyê qeza de rewşêka awarte vejîyaya meydan. Polîs û leşkeran heme kuçeyî girewtê û nêverdanê welatijî vîyarê herêma serê sînorî.
