Rojnameger Hakki Boltan û Bîlal Guldem seba roniştişê dewaya muxabirê ma Nedîm Orûç veng da heme sazgeh, dezgeh, komele û sendîkayanê rojnamegeran ke piştgirî bidê dewa û dîyar kerd ke girewtişê Nedîm Orûçî vera qanûnan o û ganî bilez bêro veradayene û o agêro karê xo ser.
Çapemenîya Kurdî her wext her ca de û her qade de raştê teda û zordarîye ameya. La her çend çapemenîya azade raştê nê polîtîkayan bêra zî her hewayî xover dana û bi hêzêko xurtêr karê xo kena. Muxabirê Ajansê Welatî Nedîm Orûç zî rojnamegeranê kurd ra yew o ke demo ke karê xo kerdêne ame astengkerdene, destbendkerdene û girewtene. Embazê ma Nedîm Orûç tewr peyên demo ke 14ê çele de Taxa Nûr a Cizîr de xebere taqîb kerdêne, bi kutişî ame destbendkerdene û dima ame girewtene. Derheqê muxabirê ma Nedîm Oruç de îdianame ame amakerdene. Mehkemaya Cezayanê Giranan a Şirnexî ya 1. Îdianameyî qebul kerd ke dozgerîye amade kerdo û rojnamegerîye sey suc vîneno. Roniştişo ewilin ê dewaya muxabirê ma Nedîm Orûçî do 24ê nîsane de bêro kerdene.
Temsîlkarê DÎSK Basin-Îşî yê Amedî Hakki Boltan, rayberê DFG’yî û edîtorê Ajansê Welatî Bîlal Guldem vengdayîşê wayîrvejîyayîşê dewa û tehlîyeya muxabirê Ajansê Welatî Nedîm Orûçî kerd. Rojnameger Hakki Boltan û Bîlal Guldem ni nê munasebetê Roja Rojnamegeranê Kurdî heme rojnamegeranê Kurd rê pîroz bo ke hepisxane û teberê welat de yê.
‘Girewtişê Nedîmî de hedef rojnamegerîya serbest a’
Hakki Boltanî dîyar kerd ke qade de karkerdişê rojnamegeran her ke şino zehmetêr beno û va: “Wexto ke Nedîm Oruç Cizîr de xeberî taqîp kerdêne, bi plan ame destbendkerdene. No nêzdîbîyayîş mojneno ke nêwazenê şima qade de xeberan taqîp bikerê. Ma vanê; ma rojnameger ê û ma qadan neteriknenê. Çapemenîya azade do her tim qadan de biba.”
‘Nedîm rojnameger o, bilez ey veradê’
Boltanî vat ke eke îqtîdarî hurmetê rojnamegerîye bikerdêne, no hêriş nêbîyêne. Boltanî veng da dezgehanê mîyaneteweyî û vat: “24ê na aşme de dewaya Nedîmî est a. Ma vanê na dewaya ma ya, şima nêşênê rojnamegerîye bîyarê mehkema. Nedîmî bilez veradê.”
‘Çi beno wa bibo, ma rojnameger ê’
Boltanî bi munasebetê 22ê Nîsane Roja Rojnamegerîya Kurdkî pîroz kerd û vat: “Seba demokratîkbîyîşê Tirkîya, estbîyayîşê çapemenîya azade zaf muhîm a. Nedîmî ra bigîrê heta şehîdanê ma, ma do her tim xeta heqîqetî de rayra şêrê. Çi beno wa bibo, ma do rojnamegerîye bikerê.”
‘Girewtişê Nedîmî vera qanûnan o’
Bîlal Guldemî zî dîyar kerd ke Nedîm nêzdîyê çar aşmî yo zindan de yo û na rewşe qet huquqî nîya. Guldemî vat: “Nedîm wextê karkerdişî de, bi îşkence ame girewtene. Ganî o ewro karê xo ser de bîyêne, la çi heyf ke zindan de yo. Ma nê girewtişî qebul nêkenê.”
‘Nedîm seba ke rojnamegerîya kurdkî kerdêne ame girewtene’
Guldemî vat ke girewtişê Nedîmî yew heyfgirewtiş o û wina dewam kerd: “Nedîm seba ke peyê heqîqetî de bi, ame girewtene. Ma veng danê heme sendîka û dezgehan ke 24ê nê aşmî de wayîrê Nedîmî vejîyayê. Piştgirîya ma do na dewa pûç bikero.”
Roja Rojnamegerîya Kurdkî
Guldemî peynî de vat ke 128 serrî yo no tradîsyon dewam keno: “Ma heme kedkaranê çapemenîya azade yad kenê. Ewro zî hêrişî sîstematîk ê; malperî yenê girewtene, xeberî yenê sansurkerdene. La ma do her tim bibê vengê rastîye.”
