Profesor Michel Fayadî dîyar kerd ke eke ewro kurdî yenê qirkerdene, sebebêkê ci zî Emmanuel Macron o, eke wina nîyo ganî Macron îsbat bikero.
Parlamenterê Fransayî Damîen Gîrardî zî dîyar kerd ke ganî Fransa meselaya Rojava de rolêko dîplomatîk û qerardarêr û eşkerayêr bigîro xo ser.
‘Qirkerdişê kurdan ra Macron berpirsîyar o’
Stratejîstê Enstîtûya Petrolî yê Fransa Profesor Dr. Mîchel Fayadî televîzyonê CNewsî de rexneyê huşkî Serokkomarê Fransa Emmanuel Makronî rê kerdî. Fayadî ard vîrî ke Fransa piştîya lazime nêdaya Îdareyê Xoserî û Macron sey berpirsîyarê qirkerdişê kurdan pênase kerd û vat: “Eke ewro kurdî yenê qirkerdene, ganî bizanîyo ke bi qebulkerdişê Macronî yenê qirkerdene. Eke wina nêbo ganî Macron îsbat bikero.”
‘Ganî Fransa çalak bo’
Parlamentero Ekolojîst ê Meclîsê Neteweyî yê Fransa Damîen Gîrardî Ajansê ANF’yî rê qisey kerd û vat ke ganî Fransa meselaya Rojava de rolêko dîplomatîk, çalakêr, qerardarêr û eşkerayêr bigîro xo ser. Gîrardî vat ke ganî Fransa heme îmkananê xo seba çareserîyêka sîyasî bişuxulno ke heqê bingeyin ê kurdan nas bikero û aştîyêka menda peyda bikero.
‘Hiqûqê şerî yeno binpaykerdene’
Gîrardîyî dîyar kerd ke hêrişê vera sîvîlan binpaykerdişê hiqûqê şerî yo eşkera yo û vat: “Seba ewleyî û xoserbîyayîşê kurdan bêro peydakerdene, ganî Fransa heme hacetanê dîplomatîk û sîyasîyan bişuxulno. Ganî Fransa û Yewîya Ewropa hetkarîyanê xo zêde bikerê û piştî bidê Rojava.”
