Hereketa Kulturî ya Cinîyan a Kevana Zêrîn, seba 12. serrgêra şehadeta awankerdoxa PKK’î û pêşenga Hereketa Cinî ya Kurd Sakîne Cansiz, klîbêk bi nameyê “Sakînayê” viraşt û raya yewine zî bi NUJINHA’yî ra bar kerd.
Vatişê deyîrî bi nameyê “Sakînayê”, hetê Sîdar Amed ra ame hadrekerdiş. Klîbê deyîrî zî hetê Feraşîn Demhat ra ame viraştiş. Aranje û mîksê ci hetê Xwezan Harun, saz zî hetê Mordem Firat, gîtar zî hetê Varon Candemîr ra ame pirodayiş. Xwezan Harun û Mordem Firat pîya vokalîstîya deyîrî kerdê.
‘Embaz Sara efsûna cuyeya şoreşgerî ya’
Sîdar Amed ê ke deyîrî vano, dîyar kerd ke gama vatişê deyîrî nuşto zaf tengayî anto, seba ke nêeşkîyayo Sakîne Cansiz bi vatişan bîyaro ziwan. Sîdar Amed va: “Gama destpêkê mi Embaz Sar nas kerd, hereketa a, vindertişê a ya bi dîsîplîn, bandorêka gird mi ra viraşt. Mi xo ra va ke ‘cewhera xo Roje ra girewta’ û na yewe bî semed ke weşêr û bi heybetêr bibo. Mi no deyîr, sey deynêko embazîye nuşt. Heme cinî, mêr, her kesê ke embaz Sara nas kenê, lazim o behsa a bikê. Embaz Sara, efsûna cuyeya şoreşgerî ya.”
