Cagira Serekîya Grûbe ya DEM Partî Gulîstan Kiliç Koçyîgîte derheqê zabitnameyanê pêvînayîşê Îmralîyî de erjnayîşê xo kerdî, dîyar kerd ke Rayberê Şarê Kurdî Abdullah Ocalanî bi îsrar vat ke ‘vurîyayîşê Sûrîye ganî demokratîk bo.’
Komîsyono ke meclîs de awan bîyo, 24ê teşrîna peyêne şîbî Girawa Îmrali û Rayberê Şarê Kurdî Abdullah Ocalanî reyde pêvînayîş kerdbî. Zabitnameyê ke pêdîyayîşî de ameyî girewtene, bi heme israranê Dem Partî reyna raya pêroyî rê nêame wendene. Perêyî bi hewayêko kilmkî keyepelê meclîsî de ame weşanayene. Cagira Serekîya Grûbe ya DEM Partî Gulîstan Kiliç Koçyîgîte derheqê zabitnameyanê Îmrali de erjnayîşî kerdî û sey “metodo ke rast nîyo” bi name kerd.
‘Zabitnameyî bi kilmkî weşanîyayî’
Koçyîgîte vat: “Ma verê ra waştêne ke nê zabitnameyî bêrê weşanayene. 4ê kanûne de kombîyayîşê Komîsyonê Meclîsî de heme zabitnameyî ney, yanî 16 rîpelî ney tena bi hewayêko kilmkî weşanîyaybî. Ma îtîraz kerdbî. No metod rast nêbî. Ganî nê zabitnameyî vernîya komîsyonî de, bi amancê agahdarîya endamanê komîsyonî biameyêne wendene.”
‘Şarî ganî bi nasnameyê xo rêxistin bikerê’
Koçyîgîte bale ante vengdayîşê 27ê şubate ser o, vat: “Xurtbîyayîşê herêmkî, xurtbîyayîşê demokrasîya herêmkîye, bi nasnameyê xo temînkerdişê rêxistinbîyayîşê şaran û sîstemî de akerdişê kanalan ê beşdarîya seypêye, azad û demokratîke. Birêz Ocalanî no hem seba Tirkîya hem zî seba Sûrîye reyna îfade kerd.”
‘Pawitişê prosesê haştîye eynî wext de pawitişê Rojavanî yo’
Koçyîgîte behsê hêrişanê vera Rojavanî zî kerd, wina dewam kerd: “Tezê Birêz Ocalanî Rojavanî de ciwîyenê. Hêrişê ke ewro vera Rojavanî yenê kerdene, hêrişê vera tezanê Birêz Ocalanî, paradigmaya ke paweno û îradeyê cuya şaran bi seypêyî, azadî û nasnameyê xo yê. Ewro pawitişê prosesê haştî û komelê demokratîkî, eynî wext de pawitişê Rojavanî, şaranê Rojavanî û şarê kurdî yo.”
‘Vurîyayîşê Sûrîye ganî demokratîk bo’
Koçyîgîte vat: “Birêz Ocalanî vatbî ke keyeyê Esadî strukturêko zordar awan kerdo û dîktatorêk o. Eke ewro qala vurîyayîşê demokratîkî beno la eke no vurîyayîş demokratîk nêbo, no zî beno dîktatorî. Ey bale ante demokrasîya Sûrîye, bi taybetî demokrasîya herêmkîye ser o. Ey vatbî ke o vera dewleta ûnîtere nîyo la teqez ganî demokrasîya herêmkîye bibo.”
‘Qiseyê Birêz Ocalanî tarîx reyna raşt vejîyayî’
Koçyîgîte erjnayîşê xo bi nê qiseyan temam kerd: “Ewro ma vînenê ke erjnayîşê Birêz Ocalanî yê derheqê Sûrîye de raşt vejîyayê. Sîstemêko ke demokratîk nîyo, merkezperest o, mezhebperest o û ke piştîya xo daya miletperestîya erebî, do şaran û bawerîyan rê senî qirkerdişan bîyaro, ey pêvînayîşî de bale antbî nînan ser. Qirkerdişê ke ewro vera elewî û durzîyan, hêrişê vera Rojavanî, Şêxmeqsûd û Eşrefîye ameyî kerdene, cehdê vetişê şarê kurdî, wexto ke ma pîya erjnenê ma eşkera vînenê ke qiseyê Birêz Ocalanî tarîxî de reyna raşt vejîyayî.”
