Fermandarê HPG’yî Murat Karayilanî vat hêrişê çeteyanê HTŞ û dewleta tirkan yê vera Rojava vera kurdan komployêk û planêko gird o.
Fermandarê HPG’yî Murat Karayilanî ke programêkê taybet ê Stêrk TV’yî de qisey kerd îfade kerd ke hêrişê çeteyanê HTŞ û dewleta tirkan yê vera Rojava vera kurdan komployêk û planêko gird o û vat: “Ame waştene ke bi Peymana Sykes-Picotî herême bêro dîzayn kerdene. Nika zî semedê newera dîzaynkerdişê herême reyna Sûrîye ra dest pêkerd.”
Karayilanî bale ant vengdayîşê Rayberê Şarê Kurdî Abdullah Ocalanî yê 27ê sibate ser o û vat: “Bingeyê nê vengdayîşî de aştî û wayûbiratîya mabênê şaran est a. No komplo şaran keno dişmenê yewbînan.” Karayilanî vat: “Wa Erdogan û Bahçelî bizanê ke; serê cenazaya Rojavayê Kurdîstanî de kurdan reye aştî nîna kerdene.” Karayilanî semedê wedaritişê dorpêçê serê Kobanî û korîdorê mendeyî yê mabênê Kobanî û Cizîre veng da raya pêroyî.
Qiseykerdişê Karayilanî ra qismêk wina yo:
“Hêrişo ke 6ê çeleyî de Helebî ra ame destpêkerdene averşîyayîşêko normal nîyo. Semedê newera dîzaynkerdişê herême planêko hîra yo. Dîzayno ke Şerê Dinya yê Yewinî de bi Sykes-Picot ame destpêkerdene, ewro newera serê Sûrîye ra beno. Wazenê serkêşîya rayberê HTŞ’yî Colanî de Sûrîyeya newîye înşa bikerê. Kurdî û HSDyo ke vera DAÎŞ’î beşo muhîm ê Sûrîye xelisna teberê prosesî de yenê verdayene.
Pêvînayîşo ke 4ê çeleyî de mabênê HSD û Şamî de ame kerdene, ame sabotekerdene, dima ra 5ê çeleyî de Paris de serkêşîya Amerîka de mabênê Sûrîye û Îsraîlî de kombîyayîş ame kerdene ke Tirkîya zî bi rayîrê Sûrîye tewre ci bîye, dima ra 6ê çeleyî de hêrişê vera Helebî dest pêkerd. No zî mojneno ke nê hêrişê plankerde yê.
Eşkera yo ke no komployêk û planêko gird o. Aktorê sey Tirkîya, Arabîstanê Suudî, Katar û Urdun yê herême û hêzê mîyanneteweyî yê sey Amerîka, Îngîlîstan, Almanya û Fransa qebul kerdo. Waştişê înan o yo ke dîzaynê neweyî de ca medê kurdan. Wazenê Rojava bikerê ‘Mahabado dîyin’ coka hêrişî vera pêro kurdan ê û xoverdayîşê YPG, YPJ û HSD’yî semedê pêro kurdan yeno kerdene.
No komplo sey komployê 15ê sibate yo. Yeno waştene ke vengdayîşê Rayber Apoyî yê 27ê sibate bêro sabotekerdene. Bingeyê nê vengdayîşî de aştî û wayûbiratîya mabênê şaran est a. No komplo şaran keno dişmenê yewbînan. Wa Erdogan û Bahçelî bizanê ke; serê cenazaya Rojavayê Kurdîstanî de kurdan reyde aştîye nêyena kerdene. Eke raşta aştî wazenê ganî nê sîyasetî ra fekveradê.
Îdîayê ‘projeyê wayûbiratîya şaran ê HSD’yî rijîyayo’, raşt nîyo. Şarê ereban HSD’yî ra dûrî nêkewto, tay eşîrê ereban ke goreyê dengeyan têgêrenê kewtî dûrî. Rixmê nê xeylê şervanê erebî hema sefanê HSD’yî de şer kenê. Ganî hemkarîya kurd-ereban bêra domnayene û nêzdîbîyayîşê nîjadperestî bêrê redkerdnee. Îdîayê ‘Koalîsyonê Mîyanneteweyî HSD’yî şuxulna û caverda’ zî raşt nîyê. Xora tekîlîya mabênê HSD û koalîsyonî vera DAÎŞ’î hemkarîyêka taktîkî bî, çiray stratejîk nêbîye. La koalîsyonî HSDyo ke awanîya demokratîk a têna verda û zemînê xurtkerdişê awanîyanê selefîyan hazir kerd. Rixmê bedelanê girdan ê HSD’yî têkoşînî manaya xo vîndî nêkerd, sey tim bi hêzê teberî ney, bi hêzê xo û paştîdayîşê şarê xo têgêreno.
No şer herême de hetê HTŞ, DAÎŞ û dewleta tirkan ra yeno rayraberdene. Dewleta tirkan plankerdox a; bi paştdayîşê hêzanê SMO’yî, yewîyanê taybetan, ÎHA, SîHAyan fîîlen mîyanê şerî de ya. Waştişê ci o yo ke Sûrîye de sîstemo ke wayûbiratîya şaran esas geno, bêro rijnayene.
HSD de bin nêkewto, vera hêrişanê komployê girdî xover dano. Koalîsyono ke serkêşîya ci Amerîka kena, HSD tena verda û nê semedî ra tay eşîran hetê xo bedilna. Tay cayan ra ancîyayîşê HSD’yî qeraro stratejîk û raşt o. Pêkewtişê kurd-ereban ame astengkerdene. Nika sînorê Kurdîstanî de xoverdayîş dewam keno.
Şar bingeyê yewîya neteweyî de wirişto payan ser, no erjîyaye yo; ganî çalakîyê demokratîkî dewam bikerê, vernîya provokasyonan bêra pawitene. Wazenê ke nê dîzaynê neweyî de reyna ca medê kurdan. Coka ganî pêro hêzê sîyasî yê kurdan problemanê xo yê zereyî caverdê û yewîya neteweyî bîyarê ca.
Îdîayê ‘tekîlîya PKK’yî bi Sûrîye est a’ raşt nîyê. Ganî şar adirbestan reyde nêxapîyo. Bi taybetî Kobanî binê ablûqa de ya û hetkarîya lezûbeze ya mîyanneteweyî hewce kena. Ganî ablûqa bêra wedaritene, mabênê Kobanî û Cizîre de korîdoro mende bêro akerdene û hewa ra çimdarîye bêro caardene. Semedê nê ganî xebatî bêrê rayraberdene û biresîyo dezgehanê eleqedaran. Ganî ma her cayê dinya de semedê wayîrvejîyayîşê Kobanî wezîfeyê xo bîyarê ca.”
