Welatijanê Amedî ke tewrê nobeta pawitişê Rojava yê Meydanê Şêx Seîdî bî vat: “Ganî ma seba Rojava her wext lingan ser o bi. Ma moral û paştî danê şarê xo yê Rojava.”
Hêrişê çeteyanê HTŞ û DAIŞ’î yê ke bi paştîdayena Tirkîya têgêrenê serê Rojava û Kobanî dewam kenê. Seba şermezarkerdişê hêrişan xeylê şaristananê Vakurê Kurdîstanî de çalaki yenê viraştene. Amed de verva hêrişan û seba pawitişê destkewteyanê Rojava, bi pêşengîya Platformê Sazgehanê Demokratîkî Meydanê Şêx Seîdî de çalakîya nobete ameye destpêkerdene. Her roje di hîrê sazgehî nobete gênê û paştî danê çalakîye.
Welatijanê ke derheqê hêrişanê Rojava ser ajansê ma rê qisey kerd, nerazîbîyayîşê xo da mojnayene û vengdayîşê paştîdayena Rojava kerde. Welatijan wina vat: “Ma verva hêrişanê Rojava ser nê çalakîyan virazênê. Ma wazenê şarê Rojava reyde mîyanê paştîdayene de bê. Ma seba bibê vengê Rojava tîya yê. Sey şarê Amedî ma payan ser o yê. Ma paştî danê şarê xo yê Rojava. Ma moral danê înan.”
