Şarê Êlihî seba paştîdayîşê rojava siba do rayîrşîyayîşêko girseyî virazo. Rayîrşîyayîşo girseyî de ke Hemserekê DBP’yî Keskîn Bayindir zî tewrê ci bibo do hêrişê vera Rojava berê şermezarkerdene û vengbidîyo dinya ke seba paştîdayîşê Rojava wirzê lingan ser.
Pêroyê Vakurê Kurdîstanî de rayîrşîyayîş û çalakî seba paştîdayîşê Rojava dewam kenê. Nê cayan ra yew ke çalakîyê şewe yenê viraştene, şaristanê Êlih o. Şarê Êlihî na reye bi hewayêko girseyî do vejîyo waran û hêrsê xo yê vera hêrişanê çeteyan biyaro ziwan.
Vengdayîşê tewrbîyayîşî
Welatijê şaristanî bi pêşengîya Platformê Sazgehanê Demokratîk ê Êlihî siba (28ê çele) do rayîrşîyayîşêko girseyî virazê. Vengdayîşê rayîrşîyayîşî bi sernameyê “Şarê Êlihî yo welatperwer seba Rojava rayra şono” ame parekerdene. Vengdayîşî de ame vatene ke vera hêriş û dorpêçkerdişê Rojava pêroyê welatijê şaristanî dawetê rayîrşîyayîşê girdî kenê.
Bi tewrbîyayîşê Keskîn Bayindir
Rayîşîyayîş do siba saete 13:00î de dest pêbikero. Şar do vernîya Parka Yilmaz Guney ê serê Cadeyê Dîyarbekîrî de bêro pêser û tîya ra dest bi rayîrşîyayîş bikero. Hemserekê DBP’yî Keskîn Bayindir û parlementerê DEM Partî yê herême zî do tewrê rayîrşîyayîşî bibê û mesajê xo yê seba paştîdayîşê Rojava îfade bikerê.
