Parlamenteranê Swîsre waşt ke hêrişê vera Rojava bêrê vindarnaye û venga hukmatê Swîsre û hêzanê mîyanneteweyîyan da ke vera hêrişan hereket bikerê.
Grûbêka parlamenteranê partîyanê çep û raştgiranê Swîsre eşkerayîyêka hempare daye û dîyar kerd ke bi hêrişanê cîhadîstan sîstemê Rojava yo demokratîk yeno hedefgirewtene.
Parlamenterê Partîya Keskan Balthasar Glattlî ANFyî rê qisey kerd û vat ke grûbêk parlemanteranê raştgir û çepgiran ê Swîsre seba pawitişê Rojava kewtî mîyanê cigêrayîşî. Glattlî vat: “Ma nêeşkenê 6 aşmî yan zî serrêk vinderê. Tena şarê Rojava ney, ma mecbur ê ke Ewropa zî vera çeteyê DAÎŞî bipawê ke beno ke ê hepisxaneyan ra biremê.”
‘Hêriş vera modelê Rojava yeno kerdene’
Parlamenterê Partîya Sosyalîste Fabian Molîna zî dîyar kerd ke Rojava hetê demokrasî, federalîzm û seypêyîya cinsîyetî ra modelêko muhîm o û nê erjî vera îdeolojîya cîhadîst ê. Molîna dîyar kerd ke seba naye hêriş vera sîstemê Rojava yê xoserî yeno kerdene û vat ke Swîsre ke erjanê heqanê însanan û demokrasî pawena, wa Rojava reyde berpirsîyarîyêka taybete bigîro xo ser.
Molîna bale ante ke bi piştîdayîşê dewleta tirkan Rojava de huqûqê însanan ê mîyanneteweyî binpay beno û seba ke hêrişî rew bêrê vindarnayene û seba pawitişê huqûqê mîyanneteweyî waşt ke sere de Netewê Yewbîyayeyî hêzê neteweyî bikewê mîyanê cigêrayîşêk ke çareser bikerê.
