Rewşa têmîyankewta ya dewa Deşta Avê ke di rojî ra ver cerdevanan hêrişê garanê pesê dewijan kerdbi, dewam kena. Ame zanayene derheqê cerdevanan de cipersayîş nêameyo destpêkerdene.
Dewa Deşta Avê ya qezaya Hîzanî ya Bêdlisî de 2oê hezîrane de cerdevanan nîmeyê şewe bi çekan hêrişê garanê pesê dewijan kerdbi û zafêrê se hezar pesî kiştbî. Şiwaneyan bi zorê xo xelesnabi û agahî dabî dewijan. Agahdarkerdişê ser o leşkerî zî ameyê herême û cayê hedîse de cigêrayîş kerd. Rewşa têmîyankewta ya herême hema zî dewam kena û leşkerî îhtîmalê qewimîyayîşê hedîseyêka bîne ya mumkin ra herême de ameyê bicakerdene.
Cerdevan leşkeran reyde hemkarîye kenê
Dewijê ke ma bi telefonî xo resna înan dîyar kerd ke 3 hebî cerdevanan hêrişê pesê înan kerdo û derheqê nê cerdevanan de zî tu destbendkerdiş yan zî cipersayîş nêameyo destpêkerdene. Dewijan da zanayene ke nê cerdevanî rasterast çend serleşkeranê Qereqolê Xorosî reyde xebitîyenê û bi hemkarîya înan nê hêrişî kerdo. Sewbîna dewijan dîyar kerd ke xeylê reyan leşkerê Qereqolê Xorosî ciwananê înan rê îşkence kerdo û dewijan ra vato, “Şima armenî, xirîstîyan ê û ma nêverdanê şima tîya de bimanê.”
Dewijî seba ke agêrê warê xo paweyê hetkarî û piştgirî yê.
