Dayîkê Aştî derheqê çalakîyanê Sersefîrîyan de dîyar kerd ke seba akerdena bêranê sînorî û korîdorî ma nê çalakîyî viraştê û vat: “Tena ma ney, wa pêroyê dinya vengê Rojava bihesîyê. Gedeyî serdan ver cuya vîndî kene, wijdanê dinya senî cayê xo de vindeno?”
Dayîkî seba ke şer bivindo û dorpêçê dormeyê Kobanî ravazo û gedeyî serdan ver memirê waran de yê. Dayîkê ke şîbî verê sersefîrîya Sûrîye înan ra Turkan Acar û Tezgul Yorulmaze ajansê ma rê qisey kerd.
Turkan Acar dîyar kerd ke ê her ca de hêrişanê serê Rojava şermezar kenê û wina vat: “Seba ke hêrişanê serê Rojava şermezar bikerê ma çend rojîyo şinê vernîya Sersefîrîyan. Merdimê Rojava xisim û aqrebayê ma yê seba nayê ma nêwazenê kiştiş virazîyo. Dayîkî seba vindarnayîşê şerî waran de yê. Wa dewleta Tirkîya sînoran akero. Ewro şarê Rojava bêawe û bênano. Gedeyê Rojava sebebê serdî ra cuya xo vîndî kenê. Ma do lazimatîyê werdene biresnê Rojava. Ti wijdan çîyê ke Rojava de benê qebûl nêkeno. Ma şer nêwazenê, Wa dinya de aştî virazîyo. La ma çiqas aştîye wazenê hêrişê ma kenê.”
‘Wa pêro dinya vengê Rojava bihesîyo’
Turkan Acar ard ziwan ke Dayîkê aştî bi çalakîyanê xo yê vernîya Sersefîrîyan waşt ke vengê Rojava biresnê pêroyî dinya û vat: “Tena ma ney, wa pêro dinya vengê Rojava bihesîyê. Gedeyî serdan ver cuya xo vîndî kenê, wijdanê dinya senî bar dano? Cinî yenê kiştene, kezî yê înan yenê qesnayene. Seba akerdişê beranê sînorî û korîdorî ma nê çalakîyan viraztî.”
‘Ma nêwazenê ti kes bêro kiştene’
Dayîka Aştî Tezgul Yorulmaz çalakîya vernî Sersfîrîya Sûrîyeyî de hîs û ewnayîşê xo ard ziwan: “Ma ewro vernîya Sersefîrîye de çelengê xo rona û çalakîya xo viraşte. Amancê ma waştena ma aye ke şer ney aştî virazîyo, nê semedî ra ma hemverê şerî vejênê, ma nêwazenê ti kes bêro kiştene. La gedeyê ma yenê kiştene, cinîyê ma û ciwanê ma yenê kiştene. No şer zaf qilêrino, ma nêwazenê zav û zêçê kesî zî bêro kiştene. Na dinya zaf xerepîyaya.”
‘Ez venga heme dayîkan dana wa bêrê têhet û nê şerî bivindarnê’
Tezgul Yorulmaze dewamê qiseyê xo de wina vat: “Heme cayan de şer est o, barbarê DAIŞ’î zaf zulim kenê, “Ellahû ekber” vanê sereyê însanan tira kenê. Dinya de zaf xedarî est a, ma wazenê no zulim bêro virdarnayene, endî bes o. Na yewe ra ma dayîkê aştî waran de çalakîyanê xo dewam kene, ma vanê wa aştî virazîyo. Ma vanê wa dewleta Tirkîye, Amerîka û dewletê mîyanneteweyî bêveng nêmanê. Ez vengdayîşê heme dayîkan kena ke wa bêrê têhet û no şerî bidê vindarnayîşî ke dejê dayîkan biqedîyo, endî bes o wa hêsrê dayîkan nêrijîyo.”
