Fermandarê Pêroyî yê QSDyî Mazlûm Ebdîyî vat, “Goreyê pêkerdişî artêşa Sûrîye dewî zî tede do demekewo bajaranê kurdan. Destkewteyê ma do bêrê pawitene.”
Fermandarê Pêroyî yê Hêzanê Sûrîyeya Demokratîke (HSD) Mazlûm Ebdîyî derheqê averşîyayîşanê Rojavan û Sûrîye de programê taybetî yê Ronahî TV’yî rê erjnayîşî kerdî.
Mazlûm Ebdîyê ke qala pêkerdişê mabênê HSD û Şamî kerd, vat: “No prosesêk bi. Nê prosesî 18ê çeleyî de dest pêkerd. O wext pêkerdişêk bi; la çarçeweya ci teng bî. Ma şîyî Şamî, Şara reyde pêvînayîş ame kerdene. Ewro zî ma telefon de qisey kerd û ma her di hetan zî pêkerdiş îmza kerd. Bi nê pêkerdişî waştişê ma yo tewr pîl o yo ke adirbirnayîş bêro caardene. Vera şarê ma tehdîtê qirkerdişê girdî bibi. Seba ke ma verê nê bigêrê, çîyo ke destê ma ra ame ma kerd. Ma dî ke hêzê mîyanneteweyî semedê vergirewtişê qirkerdişî çîyêk nêkenê, ma semedê pawitişê heqanê şarê xo wina yew pêkerdiş kerd.”
Mazlûm Ebdîyî ard ziwan ke pêkerdiş pêro bajar û dewan geno mîyanê xo û vat: “Artêşa Sûrîye dewî zî tede do demekewo bajaranê kurdan. No semedê herêma Cizîr û Kobanê vîyartbar o. 2ê sibate de do entegrasyon bêro destpêkerdene û no do dewam bikero. Hêzêka Hukmatê Demkî yê Sûrîye do bêro Hesekê û Qamişlo û entegrasyonî teqîp bikero. Xebatê înan heta qedîyayîşê xebata entegrasyonî yo. Bi qedîyayîşê entegerasyonî ra dima hewcedarîya înan nêmanena. Hêzê asayîşî ke girêdayeyê Hêzanê Asayîşê Zereyî yê do bajaran de asayîş bîyarê ca. Komîteyî ameyî ronayene. Hem ma hem zî Şamî komîteyî nayî ro. Semedê karanê îdarî nê komîteyî do pîya bixebitê. Bajarî ra do vila mebê û îdare û asayîşê bajarî megêrê xo ser. Şarê ma wa cayê hêzanê xo de vindero û paştî bidê dezgehanê xo yê îdarî.”
‘Ablûqaya Kobanê do bêro wedaritene’
Mazlûm Ebdîyî bale ante destkewteyanê ke netîceya pêkerdişî de ameyî destfînayene ser û nê vatî: “Hedefê ma çîyê ke ma ewro fînayî dest înan ra girdêr bê. Keda ke ameye dayene zî ganî wirdi nêro vînayene. Pêkerdiş semedê hetê sîyasî, leşgerî û îdarî ra pawitişê bajarano kurdan o. Destkewteyê ma do bêrê pawitene. Armancê ma est ê, semedê destfînayîşê înan, têkoşînê ma do dewam bikero. Destkewteyê warê kultur û perwerdeyî do bêrê pawitene. Semedê perwerdeyî pêvînayîşî do dewam bikerê, semedê pawitişê destkewteyan çîyo ke destê ma ra yeno ma do bikerê. Her ca de qerarî do hetê meclîsanê cayî ra bêrê girewtene. Ê ke nika wezîfar ê do wezîfeyê xo rê dewam bikerê. Bajaranê kurdan de îdareyî do dewam bikerê. Destkewteyê şorişî do bêrê pawitene. Tay kêmayî est ê, semedê înan zî ma do têkoşîn bikerê. HSD sey tugayan mîyanê artêşa Sûrîye de do fermî ca bigêro û bajarê ke nika tede yê do înan bipawê. Ablûqaya serê Kobanê do bêro wedaritene. Eke pêkerdiş bêro caardene Kobanê û Cizîr de do leşkerî peyser biancîyê. Hêzê ma zî do bajaran ra bivejîyê. Eke no bêro caardene ablûqa do biqedîyo.”
‘Her kes do cayê xo de bimano’
Mazlûm Ebdîyî derheqê rewşa Efrîn û Serêkanîyê de zî nê vatî: “Efrîn bajarê kurdan o. Se ra 90 kurd o. Ganî madeyê pêkewtişî nînan zî bigêrê mîyanê xo. Beno ke no biney wext bigêro la penî do bibo. Ê ke ûca ciwîyenê do agêrê keyeyanê xo. Semedê wextê verê ma de pêkerdişê ke semedê bajaranê kurdan ameyî kerdene do semedê bajaran ke binê kontrolê ma de nîyê zî vîyartbar bê. Her kes do cayê xo de bimano. Wezîfeyê hêzanê ke ameyî Hesekê û Qamişlo newera ronayîşê îdareyê dezgehanê dewlete yo. Dezgehê Îdareyê Xoserî do bêrê entegrekerdene.Walîyê Hesekê do hetê şarê kurdî ra, HSD’yî ra bêro vîjnayene. Kesê ke dezgehan de xebiteyenê do wezîfeyê xo rê dewam bikerê.”
‘Semedê yewîya kurdan ganî ma bixebitê’
Mazlûm Ebdîyî vat: “Hêzê mîyanneteweyî zî parçeyêkê nê pêkerdişî yê. Amerîka û Fransa her hetê pêkerdişî de est ê. Ê do prosesî teqîp bikerê. Trumpî bi xo Şarayî reyde derheqê pêkerdişî de qisey kerd. Macronî zî çend rey qisey kerd û waşt bibo garantoro sîyasî. Dewletê garantorî ganî wezîfeyê xo dahîna bi dîqet bikerê. Derheqê esîran de ma verî zî Şamî reyde pêkerdiş kerdbi. Ma do rewşa esîran teqîp bikerê. Seba ke ez mîyanê dewlete de wezîfe bikerî, pêşnîyazî ameyî kerdene la mi embazê xo yê bînî pêşnîyaz kerdî. Ma do ewro ra tepîya mîyanê şarê xo de bi. Ganî ma semedê yewîya kurdan bixebitê.”
‘Ma bi nê paştdayîşî sereberz ê’
Ebdîyî derheqê çalakîyanê paştdayîşî de nê vatî: “Nê çalakîyê paştdayîşê ke nê wextê peyên de ameyî kerdene, ma pê înan sereberz ê. Nînan moralo pîl da ma. Nê çalakîyan gamê ke ameyî eştene înan ser zî zaf tesîr kerd, balê dinya ante Rojavanî ser. Ez semedê nê çalakîyan spas kena. Partîyanê kurdan zî îmtîhano hol da. Başûr de heme partî her roje cayê ma de bî, zaf paştî daye. Ez pêrune rê spas kena. Xora şarê Rojavanî heme herêman de tim cayê ma de yo. Ma zanê ke keyfê tayînan nê pêkerdişî de nêameyo. Ma zî tay babetan de keyfweş nîyê. Pawitişê şarê ma gird bi. La ma semedê vindarnayîşê pêkewtişan wina kerd. Ma soz danê şarê xo ke semedê pawitişê heme destkewteyanê xo ma do têkoşîn rê dewam bikerê. Kam ke keyeyanê xo ra vejîyayo wa agêro keyeyanê xo. Cayê ke binê îdareyê HSD’yî ma pîya nê cayan de têkoşîn bikerê. Ma bi hezaran şehîdî dayî, gazîyê ma est ê. Ma nînan xo vîra nêkenê. Ê sebebê xurkerdişê têkoşînî yê. Ma soz danê ke ma do têkoşînî xurtêr bikerê. Wa şarê ma cayê ma de vindero ke ma waştişanê xo bîyarê ca.”
