Hemşaredara Şaredarîya Amedî ya Şaristanê Girdî Serra Bucak, Komela Rojnamegeran a Dîcle-Firatî û Cemîyetê Rojnamegeran ê Başûrê Rojhelatî zîyaret kerdî û 10ê Çeleyî Roja Rojnamegeranê ke Xebitîyenê pîroz kerd.
Hemşaredara Şaredarîya Şaristanê Girdî Serra Bucak, bi munasebetê 10ê Çeleyî Roja Rojnamegeranê ke Xebitîyenê Komela Rojnamegeran a Dîcle-Firatî (DFG) û Cemîyetê Rojnamegeran ê Başûrê Rojhelatî (GGC) zîyaret kerdî û roja rojnamegeran pîroz kerd.
‘Eke no îrade nêbîyêne ma do sansurêko hîna giran bidîyêne’
Hemşaredare Bucak verê şîye DFG, uca de Hemşaredarê DFG’yî Selman Çîçek û endamê DFG’yî reyde ameye têhet. Bucak roja rojnamegeran pîroz kerd û va: “Ez Roja Rojnamegeranê ke Xebitîyenê ya embazanê ke medyaya azade de dewam kenê, pîroz kena. Serkewtişê viraştişê xeberan bedela xo est a, çi heyf ke embazê ma ge-ge ganê xo kenê bedel. Ma demêkê zehmetî ra vîyarenê. Tirkîya, azadîya çapemenî û îfadekerdişî de reyna rêzê peyênan de ya û no qet nêxerepêno; la eke tradîsyonê Apê Musa û şima nêbîyêne, ma do nika ra hîna vêşêr sansur bidîyêne.”
‘Do piştîdayîş hîna gird bibo’
Hemşaredarê DFG’yî Selman Çîçekî zî va: “Nê atmosferî de Roja Rojnamegeranê ke Xebitîyenê pîrozkerdiş keder keno la reyna zî ganî bêro pîrozkerdiş. Ma qet hêvîya xo vînî nêkerde. Ma bawer kenê ke no zîyaretê şima do piştîdayîşî hîna gird bikero.”
Zîyaretê GGC’yî
Dima Hemşaredare Bucak şîye GGC û verê awanîya cemîyetî de Serekê GGC’yî Felat Bozarslan, endamê cemîyetî û zaf rojnamegeran reyde ameye têhet. Bucak roja heme rojnamegeran ke seba ke şarî rê xeberanê rastan biresnê bexitîyenê, pîroz kerd.
Serekê GGC’yî Felat Bozarslanî zî seba piştîdayîşê aye sipas kerd. Zîyaretî de derheqê problemanê rojnamegeran û muhîmîya azadîya çapemenî de fikrî ameyî qiseykerdene.
Hemşaredare Bucak beşdarê akerdişê tesîsî bîye
Hemşaredare Bucak dima beşdarê merasîmê akerdişê “Tesîsê GGC’yî Azîz Korkmaz”î ke nameyê rojnameger Azîz Korkmaz ke 1975 de cuya xo vînî kerdo ameyo dayene, bîye. Hemşaredare Bucak akerdişî de qisey kerd û muhîmîya vîr û hafiza ser o vindert û va: “Ez vera Azîz Korkmaz û erjanê ke ey afirnayî hurmet kena. Bi seyan rojnamegeran reyde eleqedar bîyo; keyeyê ey û embazê ey çiqas pê îftîxar bikerê zî kêmî yo. Ma waştêne ke 10ê Çeleyî Roja Rojnamegeranê ke Xebitîyenê de cayêko hêvîdar ra qisey bikê ke tede heqê sendîkalî ra bigîre heta heqê xebate heme çî vera rojnamegeran garantî bibo û rojnamegerî nêrê qetilkerdiş. Ganî ma rojnamegeranê ke Rojhelatê Mîyanênî, Sûrîye, Filîstîn û herêma ma de cuye ra ameyê birrnayîş û heta cenazeyê înan zî nêdîyayo keyeyanê înan, înan bîyarê xo vîrî. Ez vera bedelê nê tradîsyonî Azîz Korkmaz, Musa Anter û ê bînan, hurmet kena.”
‘Polîtîkaya qeyyûmî do nê welat rê demokrasî nêaro’
Bucak qiseykerdişê xo bi reaksîyonê xo yê destbendkerdişê Hemşaredaranê Şaredarîya Akdenîzî dewam kerd û va: “Zîhnîyetê hukmatî yew hete ra nê welat de qalê aştî û demokrasî keno yew hete ra zî şaredarîyanê ma rê qeyyûman tayîn keno. Ma wazenê tîya ra reyna vajê; hemşaredarê ma yê Şaredarîya Akdenîzî îradeyê nê şarî yê, temsîlkarê şarî yê. Ma vanê ganî hukmat dest bi polîtîkaya qeyyûmî ra fek verado. Polîtîkaya qeyyûmî do nê welat rê demokrasî nêaro, do hîna zaf tarîtî biyaro. Ganî na polîtîkaya şaşe lez ra bêro terkkerdiş.”
Badê qiseykerdişan Hemşaredare Bucak û kesê ke uca de bîy, qordela birnaye û tesîs ame akerdene.
Hemşaredare Bucak dima rojnamegeranê ke bûroyê çapemenî yê Şaredarîya Şaristanê Girdî de xebitîyenê, înan reyde ameye têhet û 10ê Çeleyî Roja Rojnamegeranê ke Xebitîyenê pîroz kerd. Hemşaredare Bucak azadîya çapemenî û muhîmîya piştîdayîşî ser o vindert.
