Aşma Gucige (sibate) aşma Xizirî ya no semed ra Zeynel Batar maneyê Xizirî ser o ma rê qisey kerd û vat: “Xizir roja tenge de reseno. Linga Xizirî ke kewte kamcî çê, o çê de her çî beno zaf. Neweşîye nêbena. Kam ke raye de mend, Xizir reseno ci.”
Zeynel Batar Ocaxa Celal Awasî ra yo Dêrsim Pulur de dewa Kedeke de weşîya xo rameno. Girêdayeyê îtîqatê Raya Heqî yo û wextê xo ame şono serê zîyar û dîyaranê xo, şono talibanê xo, pîr û talibî pîya cem girêdanê. Aşma gucige seba elewîyan aşmêka bimbarek a, aşma Xizir Xelasî vanê cira. Çike endî tenganîya zimistanî qedîna û boya wisarî kuna serê dinya. Ma rê qalê maneyê Xizirî keno û wina vano: “Xizir roja tenge de reseno. Linga Xizirî ke kewte kamcî çê, o çê de her çî beno zaf. Neweşîye nêbena. Kam ke raye de mend, Xizir reseno ci.” Zeynel Batarî maneyî Xizir û aşma Xizirî ser o ajansê ma rê qisey kerd.
‘Xizir kam ke tengîye de mend cî rê hazir û nazir o’
Zeynel Batar, verî mîtolojîyê Xizirî ser o qisey keno û wina vano: “Xizir roja tenge de reseno. Linga Xizirî ke kewte kamcî çê, her çî beno zaf. Nêweşîye nêbena. Kam ke raye de mend, Xizir reseno ci. Xizir Elî be xo yo. Wayîrê na dîna yo. Hem kî welî yo. Awa kewserî simita dina de ebedîyo, hona ke weso. Keyke qiyemete amê, Xizir yeno, royê xo da no, sono hard.
Xizir Îlyas kî est o, kerametê dî kî est o. Xizir Îlyas ê denîzano, poşt dano. Xizir ê serê koyê gelisano, Xidir Îlyas kî yê denîzan û yê awe yo. Xizir, wextê hezretî Elî, Mûsa Elîye selamî de amo rîye dîna. Waxtê Fîravûnû de amo dîna, Fîravûn zalîm û Yezîd bî. Pîyê Xizirî kî, Belyan o, name ma ye Ela ya. Fîravûn zaf zalîmkar bî. Zalîmû Xizir kerd zere. Bimbarek laye waşto, darikê gejî waşto. Dizdenî qayte cî kerde ke, lekan viraze no. Lekan ma rê îra mendo.. Tepa Xizir lekanî keno payî, tozike ser de, tiro nêseno. Nî kûne dime, va yeno, Xizir tozke peseno ra, Xizir deste reyîno ra, sono heta Zulqirnên, Xizir Îlyas ra zamanê pîya fetelînê û çerexînê. Zulqirnên birîno ra cîya şono. Ne bînî sonê serê golê de vejîne. Xizir û Xidir Îlyasî, raştê golê yenê. Vêsanê, masûyê de hişke tey bena û vanê ma na masûye bome. Destê xo şûnê, pê dest awe rişnenê ser, se ke awe ginena masûye ra masûye bena wes. Nê vanê na awe de çîye est o. Gênê awe kenê xo ra heto bîn ra zî awe şimenê û a roje ra nahet na dinya de benê bakî. Awa heyatî Xizir û Îlyasî rê ameya. Zulqirnên dinya de bi hukumdar. Xizir kî kotîde fetelîno, uza beno kesk, beno weşîye. Xizir jû jîlê dar a. Xizir na dînya û a dînya bîn a.”
‘Xizir xelasî ya’
Zeynal Batar, qiseykerdîşe xo de vano ke: “Desê asma Çeleyî ra bije hetanû des û şeşê aşma Gucige Xizir a. Xizirê ma xeleşîya, ma ra tepîya yê Şix hesenan o, tepîya ye kûreşan o. Ma rojê Xizirî de nîyaz pozeme, some jîyarû ser. Der û cîranî yenê. Nîyaz keme vila. Mînete ke me.”
‘Sarê elewî bîyo nêbîyo tengîye der o’
Zeynel Batar, peynîya qiseykerdişê xo de, minetê sarê xo keno û wina vano: “Dewrê hezretî Edemî ra bije hatanû Mîhemed û Elî, sarê elewî bîndestîye de mendo. Henî ke heşîrîye vînenê. Zerê dewleta tirkan de kî hênî yo. Na dînya de her wext zalîmîye bîya, feqîrîye bîye, heşîrîye bîye. Heq zaneno hal û mezatê ma se beno. Rîvayetê pers kena, vano qiyamete vişîno. Roje yena, îye ke qir benê yenê pêser, poştî danê jûminî, zalûmû darenê we.”
