Şarê Dêrsimî, çeteyêke girêdayê Hukmatê Şamî û dewleta Tirkîyeyê Sûrîye de hêrişê qirkerdişan vera Kurd, Elewî û Dûrzîyan ramenê vano: “Welatê ma dej û heşîrîye rind zaneno, Rojava bekes nîyo”
Serê herdan de çiqas Kurdî estê, çiqas mordemê bi vijdan û ehlaq estê pêroyê înan vera çeteyê ke Sûrîye de girêdayeyê dewletanê desthilatdaranê û hêrîşê şaran û bawerîyan kenê nerazîbîyayena xo nîşan denê.
Şarê Dêrsimî zî kice pîl pêro pîya heşarê qirkerdişîye û seba Rojavayî wazenê çîyê bêro kerdene, no qirkerdiş bêro vindertene û aştîye bibo.
Mîyanê xo de vanê ‘Dewleta Tirke qaşo na hete aştîye vazena, o hete çira piştî dana HTŞ-DAIŞ û çeteyanê bînan.’ Şarê Dêrsimî, aştîye û biratîye ser, seba Rojavayî bi zere dej ajansê ma rê qisey kerd.
‘Seveta Rojava zerê ma jan dano’
Memed Alî Bîyer, aştîye ser gisey keno wina va: “Ma aştîye vazeme. Sarê Kirmanc şêro kotî, ûzade heşîrîye vîneno. 38î ra tepîya ma rindîye nêdîye. Sarê Kurmancî kî jê ma tengîyede ro.
‘Sarê ma feqîr û heşîr o’
Ayten Çelike vana îyê ke ûzade weşîya xo ramnenê feqîrî û heşîrîye deyê û wina domnena: “Sarê Kurmancî bîndestîyede ro. Nika ucade feqirîye û hêşîrîye anceno, zav û zêçê perûne zere tengîye dero. Îyê ke şerîyatî vazenê heşîrîye anê şarê ma ser.”
‘Rindîye rind a’
Mistefa Donmez, behsê rindîye keno wina vano: “Rindîye rind a. Sarê ma terseno, vengê xo nêvezeno. Kamî ke, vengê xo kerd berz, kenê zere. Kam beno bibo, Xirîstîyan bo, Kurmanç bo, Elewî bo, mordem mordemo. Kam ke marê meyman bo, nan dame ci, cîlê xo fîme ra, keme hewn. Ma hînî me.”
‘Rojê Xizirî rindîye bîyaro’
Husnîya Kiliçe kî mineta Xizirî kena û wina vana: “Weşîye vazenîme. Rindîye vazenî me. Vame domanê ma mekîşîye. Gonî mevejîyo. Seveta Kurmancî gonî zerê ma de sona. Çi ra qir kerê. Aştîye vazenî me.”
‘Kes kesî rê towa me kero’
Xatûn Akine ki wina vana: “Ma xiravînîye nêvazeme. Înû zaf gûnayê. Destê ma de towa nîno. Kes kesî rê towa mekero. Rindîye bêro.”
‘Sebeb çiko?’
Hesen Qal, xirabîye nêwazeno nîya vano: “Sarê ma çira qir kenê, sevev çîko? Guna nîyo. Destê û berê ma de towa nîno. Sepkerîme.”
‘Vazeme rindîye be ro’
Hanîfa Yeşîlbaş, qiseykerdîşê xo serê xirabîya kiştene vindena û wina vana: “Ma na qeydere vame ke, kes memiro. Sarê ma rind o. Kes kesî me kîşo. Çira jûmînî kîsenê. Ez şî yo Entab, herd lerza sarê ûzayî pero merd, sar sarî ra berva. Vazeme rindîye bêro.”
‘38î ra nat hêşîrîya ma nêqedîna’
Hesen Çelîk, qalê 38î keno û ano qirkerdişê Rojavayî ra wina dano girê: “Sarê ma 38î ra na het qir kenê. Berime pêser, vengê xo jû bikerme, kes kesî rê towa mekero. Ma qomê Dêrsimî vame ke, Elewîyan qir mekere. Rindîye be ro.”
Domanê Dêrsimî kî vengê xo vejenê: “Ma aştîye û rindîye wazenîme. Sarê Elewî teyna nîyê, ma biratîye vazenîme. Aştîye vazenîme.”
‘Roje Xizirî poştî bidêro înû’
Elîf Kaya, seba her kesî rindîye vazena û tenge nêwazena, wina vana: “Ma rindîye vazenîme. Rojê Xizirî kam ke tengiyedero bixelesno. Rojê des û di îmamû, Kerbela sima rê poştî bidero.”
