Hemserekê Pêroyî yê DEM Partî Tuncer Bakirhanî dîyar kerd ke peymane bi keda Ocalanî mabênê Rayberîya Xosere û Hukmatê Demkî yê Surîye de ameya îmzakerdene û şerêko mabênê kurd û ereban de ameyêne waştene, vinderto. Bakirhanî îfade kerd ke şarê kurdî vera polîtîkayanê înkarî bi ruhê neteweyî werişto we û ganî sîyasetmedarî no zîhnîyeto neteweyî açarnê îradeyo sîyasî. Bakirhanî vengda îqtîdarî ke êdî tu baxane nêmendo û waşt bilez gamî ke heqê nasname, kultur û ziwanî nas kenê, demokrasîya herême bi hêz kenê, bêrê eştene.
Hemserekê Pêroyî yê DEM Partî Tuncer Bakirhan kombîyayîşê grûba partîya xo yê hewteyî de qisey kerd û vat operasyonê sîyasî verva Partîya Sosyalîst ê Bindestan (ESP) pê amebî vist vîr û bi hawayêko huşk şermezar kerd. Bakirhanî dewamê qiseyê xo de Hemserekê Pêroyî yê ESP’î û Parlementerê verê cû yê DEM Partî Murat Çepnî ameyo destbendkerdene û wina vat: “Çi rê kesê ke sîyaset kenê û rojnamegerî destbendkerdeyê ? Ganî kesê ameyê destbendkerdene bilez serbest bêrê veradayene.”
Derheqê grev û kar veradayîşê karkeran yê xeylê cayanê Tirkîya de qisey kerd ey têkoşîna karkeran selam kenê û paştî dayene pêroyî karkerane ke xoverdayîş de yê.
Badê serkewtişan şarê kurdî çin ameyê hesabkerdene
Bakirhanî serê averşîyayîşanê Sûrîya ser o vindert û wina vat: “Reyna vatena ‘kurdî çi wazenê’ yenê kerdene. Îtîrazê kurdan verva caardişê bêstatû û polîtîkayanê înkarî yê se serran o. Şarî kurdî welatêko tede ciwîyene heta nika şaran reyde têkoşîn û bedelê giranî dayê. La hetê nê dewletan ra tim sey neyarî ameyê vînayene. Kurdî mabênê serranê 1919 û 1922î de şerê xelasîye de awankarê sereke bî. La reyna serra 1923î de sey şarê ke teberê huqûqî de ameyê verdayene.”
‘Înkarê heqê şaran rayîrê şeranê neweyan akeno’
Bakirhan peymana 6ê çeleyî 2026î Parîs de virazîyabî vîr vist û wina dewam kerd: “Na xelata peyêne rastîyêka tarîxî bî. Rixmê heme înkarî hişmendîyê neteweyî yê şarê kurdî dahîna gird bî. Şare kurdî waran de xoverdano la serê masa de çin e yeno hesabkerdene. Weriştişê şarê kurdî û îtîrazê ey verva naye bî. Kurdî nêwazenê bibê qurbanê komployan, wazenê bibê welatijê seyyewbînan. Kamcîn şar beno wa bibo, wextêko heqê şarêke nêro dîyayîşî o wext rayîrê şerêko dergûdila yeno akerdene. Ganî heqê şarê kurdî û heme şaran bêro qebûl kerdene.”
‘Ganî hişmendîyo neteweyî agêro îradeyo sîyasî’
Serê peymana mabênê Rayberîya Xosere û Hukmatê Demkî yê Surîye de ameya îmzekkerdene zî nê çî vat: “Ma do biewnî ke do senî bikewo pratîk. Sey waştena her di hetan zî nêbî la peymane her di hetê zî îstîfade tira gênê. Sere de şarê kurdî ma spasîya heme dorûverê ke hetkarîya înan pê ameye de est a kenê. Caardişê adirbestî û kemîkerdişê zordarî destkewteyo tewr gird o. Sere de Efrîn û Serê Kanîyî ganî bilez agêrê serê erdê xo. Rojava roşnaya çimanê kurdan o. Şarê kurdî ruhê yewîya neteweyî veto astêka ke tu wext nêresabî. Gureyêko gird keweno serê milê sîyasetmedaran ke na hişmendîye açarnê îradeyêko sîyasî.
‘Ocalanî destûr nêda şerê kurd û erebî kûr bibo’
Bakirhanî dewamê qiseyê xo de wina vat: “Eke ewro mabênê kurd û ereben de şer çinî yo, no saya Birêz Ocalanî de yo. Eke ewro heqê şarê kurdî ameyo qebûlkerdene saya Ocalanî de yo. Seba mojnayena helwest û keda ey ma spasîya Ocalanî kenê.
‘Seba game eştene bahane nemendo’
Bakirhan vengdayîşê îktîdarê Tirkîye kerd û waşt ke Anqara endî dest Sûrîye ra verado û enerjîya xo seba Tirkîya xerc bikero. Bakirhanî wina vat: Ganî endî gamanê pêbawer berê eştene. No proses ganî bi îradeyê Meclîsî û bi gamanê cesûran bêro averberdene.
