Hemserekê HDP’yî yo Pêroyî Cahît Kirkazak: “Seke Birêz Ocalan pêşnîyaz keno, bi metodê entegrasyona demokratîke naskerdişê heqanê kolektîfan ê kurdan û bi girewtişê kurdan zereyê huquqî, qebulkerdişê statuyê kurdan, feydeyê şar dewletan o.”
Hemserekê HDP’yî yo Pêroyî Cahît Kirkazak, hêrişê vera Rojawanî û peymana ke 30ê çeleyî de mabênê îdareyê Sûrîye û kurdan de virazîyaye, erjna û vat ke kurdan bi xoverdayîş qirkerdişêko girs asteng kerd. Kirkazakî dîyar kerd ke kurdan erdê xo pawitî û garantorîya Amerîka û Fransa de prosesê entegrasyona demokratîke Sûrîye reyde da destpêkerdene.
Kirkazakî ke îfade kerd ke nê prosesî de polîtîkayê Tirkîya yê vera kurdan teşhîr bîyî, bale ante ke peymana ke Rojawan de virazîyaye, yeno manaya qebulkerdişî ke îradeyê kurdan nêşikîyena. Ey vat ke îdareyê Şamî herinda nêzdîbîyayîşanê emnîyetperestî de bi dîyalog û çareserîya sîyasîye problemê kurdî waşt çareser bikero. No, vurîyayîşo muhîm ê paradigma yo.
Kirkazakî dîyar kerd ke Rojhelato Mîyanên newe ra yeno dîzaynkerdene û nê prosesî de kurdî teqez do bibê wayîrê statu û vat: “Bi metodê entegrasyona demokratîke ke Birêz Ocalan pêşnîyaz keno, naskerdişê heqanê kolektîfan ê kurdan û zereyê huquqî de wayîrê statu bîyayîş, hem feydeyê şaran hem zî feydeyê dewletan o.”
Kirkazakî ke vat ke eke dewletê herême înkar û polîtîkayanê yewperestîye de israr bikerê, nakokîyî do xorînêr bibê, îfade kerd ke çareserîya demokratîke hem emnîyetê herêmkîye hem zî ameyoxê şaran rê mecburî ya.
Verba kurdan de bîyî yew
Cahît Kirkazakî de dîyar kerd ke îtîfaqî verba kurdan de seba feydeyanê xo bîyî yew, vat ke herême de zaf fikrî çend ke yewbînan ra cîya bibê û hemver bibê zî vera destkewteyanê kurdan de bîyî yew û pêro pîya nêwazenê ke kurdî bibê wayîrê statu. Vera nê yewbîyayîşî yewîya neteweyî ya kurdan ke nê prosesî de awan bîye, nê heme waştiş û amancî kerdî pûç.
