MHME’yî qerar da ke girewtebîyayîşê Hemserekê Pêroyî yê verênî yê HDP’yî Selahattîn Demîrtaş amancêko sîyasî yo û reyna Tirkîya mehkûmê qerarê aye kerde.
Mehkemaya Heqanê Merdiman a Ewropayî (MHME) reyna derheqê Hemserekê Pêroyî yê Verênî yê HDP’yî Selahattîn Demîrtaşî de qerarê xo eşkera kerd. Mehkema dîyar kerd ke Tirkîya azadîya îfadeyî yê Demîrtaşî binpay kerdo û no girewtiş amanc keno ke nîqaşa sîyasî bi sînor biko.
Goreyê xebera ANF’yî; MHME’yî qerarê xo yo peyênî de girewtebîyayîşî Demîrtaşî yê mabênê mahkûmîyetê êlula 2019 û 2024î de cigêrayîş kerd. Mehkema verî zî riyê girewtebîyayîşê ey ê mabênê 2016 û 2019î de Tirkîya mehkûm kerdbi û waştişê veradayîşê Demîrtaşî kerdbi. Labelê Serekkomar Erdogan nerazîbîyayîşêko hişk nîşanê nê qerarî dabi.
55 hezar Euro tazmînat
Mehkema hukm da Tirkîya ke 35.000 Euro tazmînato manewî bido Selahattîn Demîrtaşî û 20.000 Euro mesrefê mehkema bido.
Demîrtaş teşrîna peyêne ya 2016î ra Hepisxaneyê Edîrne de esîr yeno girewtene. Serra 2024î de dewaya Anqara de 42 serrî cezaya hepsî ey rê ameybî dayene. Mîyanê sucanê ke ey ser o de yê, vengdayîşê seba beşdarbîyayîşê çalakîyanê xoverdayîşê Kobanî yê vera DAÎŞ’î zî est o.
