KNK’yî seba ziwanzanê kurdî Mehmed Emîn Bozarslanî mesajê serweşîye vila kerd û vat ke Bozarslanî wexto ke nasname, ziwan û kulturê kurdî qedexe bî, tepşêko wêrek nîşan da û xebatê xo dewam kerdî.
Kongreya Neteweyî ya Kurdîstanî (KNK) seba nuştox, ziwanzan û açarnayoxê kurdî Mehmed Emîn Bozarslanî ke Uppsalaya Swêdî de 45 serrî sirgûnî de ciwîyayo û koçê xo ya peyênî kerd, mesajêk vila kerd. KNK’yî keye û şarê Kurdîstanî rê serweşîye waşte.
KNK’yî eşkerayîye de xemgînîya xo ya seba wefatê mamostayo gird ê edebîyat, kultur û ziwanê kurdî Mehmed Emîn Bozarslanî ard ziwan. KNK’yî vat ke Bozarslanî berhemê klasîkî yê edebîyat û tarîxê kurdî açarnayî alfabeya latînîye û çap kerdî û tayê nê berheman zî açarnayî Tirkî. Seba nê berheman ameybî tepîştene û bi serran hepisxaneyanê Tirkîya de mendbî.
KNK’yî vat ke Bozarslanî 1979î de seba zordarîyanê dewleta tirke neçar mendbî ke welatê xo ca verdo û xebatê xo yê akademîk û kulturî Ewropa de bêvindertiş dewam kerdî. Bozarslanî heta peynîya cuya xo hetkarîyêka girse daya ziwan, edebîyat, kultur û tarîxê kurdî û bi desan berhemê muhîmî nuştî.
KNK’yî eşkerayîya xo wina temam kerde: “Mehmed Emîn Bozarslan, wa çimê to pey de nêmanê. Keda to pûç nêbîye; bi hezaran taqîbkerdoxê to est ê û do rayîrê to de rayîr şêrê. Wesîyetê to do teqez bêro caardene.”
